هێزەكانی پاراستنی گەل – هەپەگە، بە فەرمی دەستپێكردنی جووڵەی پارتی دیموكراتی كوردستانی ڕاگەیاند، دەڵێت، “پارتی ئامادەکاری دەکات بۆ ئەوەی بەشداریی (شەڕی مێژوویی) ببێت لەنێوان گەلی کورد و داگیرکەری تورکدا”.
دوێنێ میدیاكانی پارتی نەیانشاردەوە كە هێزەكانی حزبەكە دەستیانكردووە بە جووڵە بەرەو سنوورەكان، بەوتەی خۆیان، بۆ ڕێگرییە لە پێشڕەویی توركیا و پەكخستنی جووڵەی گەریلاكانی پەكەكە.
لە ڕاگەیەندراوێكدا كە ئەمڕۆ دووشەممە بڵاویكردەوە، هەپەگە جەختدەكاتەوە كە دەوڵەتی تورکیا تەکنەلۆژیای سەردەم و چەکی کیمیایی بەرامبەر هێزەکانیان بەکاردەهێنێت، سەرباری ئەوەش ناتوانێت پێشڕەویی بکات.
هەپەگە ڕایگەیاند، ئەم شەڕە لە نێوان گەلی کورد و داگیرکەری تورکدا شەڕێکی زۆر مێژووییە، بەڵام “هێزەکانی پارتی ئامادەکاری دەکەن بۆ ئەوەی دەستبخەنە ئەم شەڕە ستراتیژییەی نێوان ئێمە و دەوڵەتی تورکەوە”، بۆ ئەوەش هەپەگە قسەی بەرپرسێکی پارتی بەناوی یاریدەدەری وەزیری پێشمەرگە و قسەکانی پارێزگاری دهۆک و ئەو زانیارییە هەواڵگرییانەی كردووە بە بەڵگە كە وەك خۆی دەڵێت دەستیانکەوتووە و ئاماژەن بۆ بەشداریكردنی پارتی دیموكرات لەو شەڕەدا و دەڵێت، “بەو شێوەیەش پەدەکە بەشداریی لەو هەنگاوەدا دەکات، کە بۆ لەناوبردنی ئێمە داڕێژراوە”.
هەپەگە داوا لە لایەنە سیاسییە خاوەن بەرپرسیارێتییەکان، ڕۆشنبیران، هونەرمەندان و دەزگا وڵاتپارێزەکانی باشووری کوردستان و هەموو هێزە کوردستانییەکان دەکات، “ئەرک و بەرپرسیارێتییان جێبەجێبکەن و ڕێگریبکەن لە دروستبوونی هێرشێکی لەمشێوەیە” و دەڵێت، “قۆناغەکە بەرەو ئاستێکی زۆر مەترسیدار دەچێت”.
