دەستەی وەبەرهێنانی هەرێم ڕایدەگەیەنێت، ئەو مەرجانەی لەبارەی دروستكردنی 20 هەزار یەكەی نیشتەجێبوونەوە بڵاوكراونەتەوە هیچ بنەمایەكی نییە و دوورە لە ڕاستییەوە.
دەستەی وەبەرهێنانی هەرێم لە ڕوونكردنەوەیەكدا بڵاویكردووەتەوە، ماوەیەكە لە هەندێك پەیج و ماڵپەڕ، ھەواڵی بێبنەما لەبارەی مەرجەكانی پێدانی 20 هەزار شووقەكە بڵاودەكرێنەوە.
لە ڕاگەیەندراوەكەدا هاتووە، سەرۆكی دەستەی وەبەرهێنان بۆ خێرا جێبەجێكردنی بڕیارەكەی حكومەت كۆبوونەوەیەكی لەگەڵ بەڕێوەبەرایەتییەكانی وەبەرھێنان لە پارێزگا و ئیدارە سەربەخۆكان ئەنجامداوە.
ئاماژە بەوەشكراوە،” لە كۆبوونەوەكەدا پێشنیازەكان لەبارەی نرخ و شێوازی قیست و دروستكردنی پڕۆژەكە خراونەتەڕوو، بەڵام تائێستا ھیچ لەو پێشنیازانە نەبوونەتە بڕیار و بەردەوام كاریان لەسەر دەكرێن و دڵنیابن حكومەت ھەوڵدەدات ، بەباشترین شێوە ئەو پڕۆسەیە جێبەجێبكات و كەسانی شایستە سوودمەندبن”.
