وەزارەتی پێشمەرگە بڵاویكردووەتەوە، لە دوو ڕووداوی جیادا بە چەكی قەناس هێرشكراوەتە سەر هێزەكانی پێشمەرگە و بە هاوەن بۆردومانی سنووری ناحیەی بامەڕنێ كراوە دوو منداڵ شەهیدبوون و پێشمەرگەیەك برینداربووە.
بەپێی ڕاگەیەندراوێكی وەزارەتی پێشمەرگە تێیدا هاتووە. دوێنێ پێنجشەممە بە چەكی قەناس هێرشكراوەتە سەر سەنگەرێكی لیوای چواری پیادە لە گوندی كانی ماسی و پێشمەرگەیەك برینداربوو.
ئاماژە بەوەشكراوە، لەكاتی هاوەنبارانكردنی ناوچەكانی بامەڕنێ گوللە هاوەنێك لەگوندی ئەرەدنا لە ناوچەی بامەڕنێی سەر بە قەزای ئامێدی كەوتووەتە خوارەوە لە ئەنجامدا، دوو منداڵ شەهیدبوون و دوو هاوڵاتییش برینداربوون.
لە ڕاگەیەندراوەكە هاتووە، ئەم ڕووداوانە لەكاتێكدابوون، هێزەكانی پێشمەرگە لەسەنگەرەكانی خۆیاندابوون.
هەر لە ڕاگەیەندراوەكەدا هاتووە، ئێمە لە وەزارەتی پێشمەرگە ڕایدەگەیەنین هێزەكانی پێشمەرگە و خەڵكی كوردستان نیگەرانن لەو كردەوانە و دەبێت هەموو لایەك تێبگەن پاراستنی ئاسایش و ئارامی خەڵك و خاكی كوردستان ئەركی لەپێشینەی هێزەكانی پێشمەرگەیە.
وەزارەتی پێشمەرگە داوادەكات، “ململانێی سەرسنوورەكان چیتر پەل نەهاوێژێت بۆ سەر هێزەكانی پێشمەرگە و پەكەكەش لەو ناوچەیە هەوڵنەدەن ئارامی و ئاشتەوایی هێزەكانی پێشمەرگە بقۆزنەوە، چونكە ڕێگەنادرێت چیتر لەم ناوچانەدا، ئاسایش و ئارامی خەڵك تێكبچێت و گیانی هاوڵاتییان و پێشمەرگە بكەوێتە مەترسییەوە”.
