سەرۆكایەتیی هەرێمی كوردستان ڕاگەیەندراوێكی لەبارەی كۆبوونەوەكانی ئەمڕۆی نێچیرڤان بارزانی، سەرۆكی هەرێم لەگەڵ لایەنە سیاسییەكان بڵاوكردەوە و ئاشكرایدەكات لەكۆبوونەوەكاندا جەخت لە گرنگی گفتوگۆی نێوان لایەنە سیاسییەكان و تەبایی و پێكەوەیی و یەكڕیزیی لایەنە كوردستانییەكان كرایەوە.
بەپێی ڕاگەیەندراوێكی سەرۆكایەتیی هەرێمی كوردستان تێیدا هاتووە، ئەمڕۆ یەكشەممە لە سلێمانی، نێچیرڤان بارزانی سەرۆكی هەرێمی كوردستان بەجیا لەگەڵ بافل جەلال تاڵەبانی، سەرۆكی یەكێتیی نیشتمانیی كوردستان، سەڵاحەدین محەمەد بەهائەدین ئەمینداری گشتیی یەكگرتووی ئیسلامی، عومەر سەید عەلی لە بزوتنەوەی گۆڕان و عەلی باپیر سەرۆكی كۆمەڵی دادگەریی كوردستان و سەركردایەتیی ئەو لایەنانە كۆبووەوە.
لە ڕاگەیەندراوەكەدا هاتووە، دۆخی سیاسیی هەرێمی كوردستان و عێراق ئاڵنگارییەكان تاوتوێكران.
هەر لە ڕاگەیەندراوەكەدا هاتووە، لەكۆبوونەوەكاندا جەخت لە گرنگی گفتوگۆی نێوان لایەنە سیاسییەكان و تەبایی و پێكەوەیی و یەكڕیزیی لایەنە كوردستانییەكان كرایەوە و هاوڕابوون كە چارەسەركردنی ناكۆكییەكانی نێوان لایەنەكان و یەكدەنگییان بە تایبەتی پارتی و یەكێتی كاریگەریی ئەرێنی بەسەر دۆخی گشتیی هەرێمی كوردستانەوە دەبێت و پێگەی كوردستانیش لە بەغداد بەهێزتر دەكات.
