بافڵ جەلال تاڵەبانی لە دەباشان لەگەڵ نوێنەرانی كاسبكار، خاوەنكار و پیشەوەرانی سلێمانی كۆبووەوە.
لە كۆبوونەوەكەدا دوای ئەوەی لەنزیكەوە گوێبیستی داوا و داخوازییەكانی ئامادەبووان بوو، بافڵ جەلال تاڵەبانی پشتگیری بۆ داواكارییەكانیان دووپاتكردەوە و لیژنەیەكی لە خودی نوێنەرانی بازاڕ و كاسبكاران پێكهێنا بەشێوەیەك پەیوەندی ڕاستەوخۆیان لەگەڵ نووسینگەی بافڵ جەلال تاڵەبانی هەبێت بۆ چارەسەركردنی كێشەكان و كۆتاییهێنان بە گرفتەكان.
لە درێژەی كۆبوونەوەكەدا بافڵ جەلال تاڵەبانی ئاماژەی بە دوایین پێشهاتە سیاسی و ئابورییەكان كرد و وتی، “ئەو دۆخە داراییەی بەسەر سلێمانیدا سەپێندراوە پرسێكی سیاسییە و لەبەرامبەر هەوڵەكانی یەكێتی و هێزولایەنە سیاسییەكانی دیكە بۆ هەمواركردنەوەی یاسای هەڵبژاردن، ڕێگریكردن لە بەهەدەردانی سامانی نەوت و ڕاستكردنەوەی هەڵەكانی حوكمڕانی بەكاردەهێنرێت”.
هەر لە كۆبوونەوەكەدا بافڵ جەلال تاڵەبانی ڕایگەیاند، یەكێتی خۆی بە خاوەنی ئەم ئەزموونە دەزانێت. هەڵەكان ڕاستدەكەینەوە و كۆتایی بەجیاكاری و پاوانخوازی دەهێنین. سەردەمی دروشم كۆتاییهاتووە و دەبێت حكومەت بەكردار خزمەتی خەڵك بكات. جیاكاری لەنێوان شارەكان قبوڵناكەین و هەموو خەڵكی خۆشەویستی كوردستان مافی ئەوەیان هەیە لە خێروبێری خاكەكەمان سوودمەندبن.
