وەزارەتی سەرچاوەكانی ئاوی عێراق دەڵێت، “هاوینێكی سەختمان لە پێشە، ئاوی عەمباركراو بە ڕێژەی 50% كەمبووەتەوە، بەڵام بەشی خواردنەوە و ئاودێری دەكات”.
عەون زیاب ڕاوێژكاری وەزارەتی سەرچاوەكانی ئاوی عێراق، دۆخی سامانی ئاوی عێراقی ئاشكراكرد و ڕایگەیاند، بە بەراورد بە ساڵی ڕابردوو، ئاوی عەمباركراو لەمساڵدا بە ڕێژەی 50% كەمبووەتەوە”.
سەرباری ئەو كەمبوونەوەیە، كاربەدەستەكەی وەزارەتی سەرچاوەكانی ئاو دڵنیایی دا لەوەی ئاوی عەمباركراو بەشی خواردنەوە و ئاودێری دەكات، بەڵام تەنها ئاودانی كێڵگە و باخ و بێستانی بچووك.
بەپێی وتەی عەون زیاب، پێدراوەكان ئاماژە بە هاوینێكی سەخت دەكەن و وتی، “بارانی بەهارە زۆر كەمبوو، بڕی كاریگەری ئاوی سەرباری ئاوی عەمباركراو نەكرد و هاوینێكی سەخت چاوەڕوانمانە”.
ئەو ڕاوێژكارەی وەزارەتی سەرچاوەكانی ئاوی عێراق ئاشكرایكرد، لە داهاتوویەكی نزیكدا شاندێكی توركیا دێتە عێراق و گفتوگۆدەكەن لەبارەی دۆسیەی ئاو و پشكی عێراق لەو ئاوانەی لە توركیاوە دەڕژێنە عێراقەوە.
