ئەحمەد سۆفی یەکێکە لە پیاوە بە تەمەنەکانی ڕۆژهەڵاتی کوردستان، دوێنێ 18 ی تشرینی دووەم کۆچی دوایی کرد، ئەحمەد سۆفی ئەگەر تا چوار مانگی دیکە زیندوبوایە ئەوا دەبووە ١٤٠ ساڵ.
ئەگەرچی بەشێک لە میدیاکانی ئێران و کەناڵی بی بی سی بەریتانی ئەم هەواڵەیان بڵاوکردەوەتەوە، بەڵام بەشێک لە بەکارهێنەرانی تۆڕە کۆمەڵایەتییەکان وێنەی ئەحمەد سۆفی بە پیاوێکی 140 ساڵی نازانن.
لە سەرژمێری ساڵی 2016 دا ئەحمەد سۆفی دانیشتووی شاری سەقز، لە ڕۆژهەڵاتی کوردستان، وەک بەتەمەنترین پیاوی ئێران دانراوە بە 135 ساڵ.
ئەحمەد سۆفی نەبووەتە باوک، بەڵام ساڵی 1996 لەگەڵ ژنێکدا هاوسەرگیری کردووە کە پێنج منداڵی هەبووە و تەنها وەک باوک سەرپەرشتی ئەو پێنج منداڵەی کردووە کە هی هاوسەری پێشوی ژنەکە بوون.
ئەمە لە کاتێکدایە پیرترین ژنی ئێران لە ساڵی ڕابردوودا کۆچی دوایی کرد کە ئەو لە تەمەنی 124 ساڵیدا دونیایی جێهێشت.
ناوەندی تەمەن لە ڕۆژهەڵاتی ناوەڕاست لە 65 ساڵییەوە بۆ 80 ساڵی تۆمارکراوە، ئەم حاڵەتانەش دەبنە حاڵەتی شاز لە مێژووی مرۆڤایەتییدا کە کەسێک بتوانێت نزیک بە 150 ساڵ بە زیندووی بمێنێتەوە، ئەگەرچی لە هەندێک وڵاتی دونیادا مرۆڤ زیاتر دەژی، کەسانی بەتەمەن لە وڵاتێکی وەک ژاپۆندا زۆرە و نزیکەی 80 هەزار کەس لەو وڵاتە لەسەرووی 100 ساڵەوەن.
