مامۆستایەک لەیەکێک لە خوێندنگەکانی پارێزگای نەجەف توندوتیژیی بەرامبەر خوێندکارێکی قۆناغی سەرەتایی خاوەن پێداویستیی تایبەت ئەنجامداوە.
منداڵەکە ناوی (ح. ب.ک)ە و لە قۆناغی پێنجەمی سەرەتاییە لە خوێندنگەی ڕوشید هیجری، باوکی ئەو منداڵە دەڵێت، “سکاڵامان لەدژی ئەو مامۆستایە تۆمارکردووە کە توندوتیژیی بەرامبەر منداڵەکەمان کردووە”.
باسی لەوەشکردووە، “کوڕەکەیان خاوەن پێداویستیی تایبەتە و کێشەی بیستنی هەیە، چەند نەشتەرگەرییەکی بۆ ئەو مەبەستە بۆ ئەنجامدراوە و ئامێری تایبەت بە بیستنی بۆ دانراوە”.
باوکی منداڵەکە دەڵێت، پێشتر بەڕێوەبەر و مامۆستایانی خوێندنگەکە ئاگادارکراونەتەوە کە بەپێی ڕێنمایی پزیشک نابێت هیچ زەبرێک بەر گوێ و سەری بکەوێت، بەڵام مامۆستاکە بەتوندی گوێی منداڵەکەمی ڕاکێشاوە و قژی ڕاکێشاوە بەجۆرێک بەشێک لە قژی لێبووەتەوە.
