بەڕێوەبەرایەتیی پۆلیسی سلێمانیی بڵاویكردووەتەوە هێزەكانیان لە ڕۆژانی جەژنی نەورۆزدا لە حاڵەتی ئامادەباشیدا دەبن و هەر كەسێك چەكی بێمۆڵەت هەڵبگرێت و تەقەی خۆشی بكات لێپێچینەوەی یاسایی لەگەڵ دەكرێت.
بەپێی ڕاگەیەندراوێكی بەڕێوەبەرایەتیی پۆلیسی سلێمانی تێیدا هاتووە، سەرجەم هێزەكانیان لە سنووری پارێزگای سلێمانی بە قەزاو ناحیەكانەوە لە حاڵەتی ئامادەباشیدان بۆ پاراستنی گیانی هاوڵاتیان و گەشتیاران.
لە ڕاگەیەندراوەكە هاتووە، داوا لە هاوڵاتیان دەكەین خۆیان بەدوور بگرن لە كاری نایاسایی ، هەڵگرتنی چەكی بێمۆڵەت و تەقەی خۆشی و هێزەكانمان لە سەرجەم شوێنەكان بڵاوەیان پێكراوە هەركەسێك سەرپێچی یاسا بكات دەستگیردەكرێت و لێپێچینەوەی یاسایی لەگەڵ دەكرێت.
ئاماژە بەوە كراوە، داوا لە هاوڵاتیان دەكەین، وەك چۆن هەمیشە هاوكاريی هێزەكانمان بوون پەیوەندیمان پێوە بكەن بە هێڵە گەرمەكانی بەڕێوەبەرایەتیی پۆلیسی پارێزگای سلێمانی:
104 بەشی پۆلیسی فریاكەوتنی سلێمانی
105 بەشی پۆلیسی نەهێشتنی تاوانی سلێمانی
