ئەندامێكی فراكسیۆنی سادیقون سەر بە هاوپەیمانیی فەتح ڕایدەگەیەنێت، “دانوستاندنی نێوان چێوەی هەماهەنگیی شیعەكان و ڕەوتی سەدر دەستیپێكردووەتەوە و دەڵێت، دانوستاندنەكانی نێوانیان ئەرێنین” و چێوەی هەماهەنگی بە مەرج بەشداری لە هەڵبژاردنی سەرۆك كۆماردا دەكات.
محەمەد بەلداوی، ئەندامی فراكسیۆنی سادیقون لە ئەنجومەنی نوێنەران بە میدیاكانی عێراقی ڕایگەیاند، دانوستاندنی نێوان چێوەی هەماهەنگیی شیعەكان و ڕەوتی سەدر دەستپێكردووەتەوە و جددی و ئەرێنین.
ئاماژەی بەوە كرد، “چێوەی هەماهەنگیی شیعەكان و ڕەوتی سەدر ڕێككەوتوون ئەنجامی دانوستاندنەكانیان بۆ ڕاگەیاندن ئاشكرانەكەن تا ئەو كاتەی دەگەنە ڕێككەوتنی كۆتایی”.
هاوكات عەباس زاملی، سەرۆكی فراكسیۆنەكە و پەرلەمانتار لە ئەنجومەنی نوێنەرانی عێراق ڕایگەیاند، چێوەی هەماهەنگیی شیعەكان بەشداریی كۆبوونەوەی هەڵبژاردنی سەرۆك كۆمار ناكات ئەگەر لەگەڵ هاوپەیمانیی سێ قۆڵیی سەدر، پارتی و حەلبووسی-دا نەگەنە ڕێككەوتن.
