نەخۆشخانەی کەفیل لە نەجەف ڕەتیدەکاتەوە، عەلی سیستانی مەرجەعی باڵای شیعەکان بەهۆی تێکچوونی دۆخی تەندروستییەوە ڕەوانەی نەخۆشخانە کرابێت.
لە ڕاگەیەندراوێکدا نەخۆشخانەی کەفیل کە سەربە مەرجەعی ئاینییە لە نەجەف ڕایگەیاند، “لە تۆڕە کۆمەڵایەتییەکانەوە هەواڵی ئەوە بڵاوبووەتەوە کە بەڕێز مەرجەعی باڵا عەلی سیستانی رەوانەی نەخۆشخانەی کەفیل کراوە، دەمانەوێت ڕایبگەیەنین ئەو هەواڵانە دوورن لەڕاستییەوە”.
لەڕاگەیەندراوەکەدا ئاماژە بەوەکراوە، کە سیستانی تەندرستیی تەواو جێگیرە و لەنوسینگە تایبەتەکەی سەرقاڵی ئەرکەکانی ڕۆژانەیەتی.
داواش لە میدیاکان و ئەوانەی ئەو هەواڵانە بڵاودەکەنەوە لە تۆڕە کۆمەڵایەتییەکان دەکات، دووربکەونەوە لەبڵاوکردنەوەی ئەو دەنگۆیانە یان پێش بڵاوکردنەوەی پشتڕاستی بکەنەوە.
