دامەزراوەی ڤیم ڕایگەیاند، لەو پڕۆژانەی لەلایەن کارسازانەوە لە پارێزگاکانی هەرێم پێشکەشکراون، 28 کارساز پشتگیرییان دەکرێت، ئەوەش دوای ئەوەی لەلایەن لیژنەیەکی پسپۆڕەوە پڕۆژەکانیان بینراون و هەڵبژێردراون.
دامەزراوەی ڤیم لەگەڵ بڵاوکردنەوەی ناوی کارسازان ڕایگەیاندووە، “لە ڕوانگەی هەستکردن بە بەپرسیارێتیی بەرامبەر بەرەوپێشچوونی کۆمەڵگە و بونیادنانی داهاتوویەکی سەقامگیر بۆ تاکەکان، سوودوەرگرتن لە توانای ئەو گەنجانەی دانەمەزراون و بیرۆکەی گونجاویان هەیە بۆ پێشخستنی ئابوریی وڵات، دامەزراوەی ڤیم بۆ جاری دووەم پرۆگرامی دەستپێشخەریی پڕۆژەی بچووکی ڕاگەیاند”.
پرۆگرامی دەستپێشخەریی پڕۆژەی بچووک بریتییە لە پشتگیریی کارگێڕی و دارایی بۆ ئەو کارسازانەی خاوەنی بیرۆکەیەکی نوێ و داهێنەرانەن، بەڵام بەهۆی بەربەستێکەوە ناتوانن ببنە خاوەنکار و پەرە بە تواناکانیان بدەن. لەم پرۆگرامەدا کارسازان بەشداریی چەندین پرۆگرام و ڕاهێنانی تایبەت دەکەن سەبارەت بە چۆنییەتی بەڕێوەبردنی کار تاوەکو بتوانن بەشێوەیەکی ئەکادیمییانە کارەکانیان بەڕێوەبەرن و کاڵا و بەرهەمەکانیان لە بازاڕەکانی کوردستان ساغبکەنەوە.
بۆ ئەم وەرزەی پرۆگرامەکە زیاتر لە سێ هەزار و 100 فۆرمی بەشداریکردن لە هەریەک لە شارەکانی سلێمانی، هەولێر، دهۆک، هەڵەبجە و کەرکوکەوە بۆ دامەزراوەی ڤیم نێردراون، دوای جیاکردنەوەی فۆرمەکان و هەڵبژاردنیان لەلایەن لیژنەیەکی پسپۆڕەوە بە لەبەرچاوگرتنی ڕێژەی سەرکەوتنی پڕۆژەکە و گونجان لەگەڵ بارودۆخی ئابوریی هەرێمی کوردستان و عێراق، یارمەتیدانی ژێرخانی ئابوری و زاڵبوون بەسەر ئاڵنگارییەکان لەپێناو جێبەجێکردنی پڕۆژەکە، ڕەخساندنی هەلی کاری زیاتر لەڕێگەی پڕۆژەکانەوە، دامەزراوەی ڤیم ناوی ئەو کارسازانە ڕادەگەیەنێت کە پڕۆژە و بیرۆکەکانیان لەلایەن پرۆگرامەکەوە پشتگیریدەکرێن.
