عێراق.. بڕی ئەو قەرزە ئاشكراكرا كە پێویستە بۆ موچەی ئەمساڵ

ئەحمەد جبوری، ئەندامی لیژنەی دارایی ڕایگەیاند، “لیژنەی دارایی لە پەرلەمان، لە كۆبوونەوەیەكدا لەگەڵ وەزارەتی دارایی، نووسراوێكی داوە بە وەزارەتەكە و داوای لێكردووە ڕوونكردنەوە بدات لەبارەی ئەو قەرزە زۆرەی داوایكردووە بۆ دابینكردنی موچە.”

وتیشی، “پێمان وایە حكومەت و وەزارەتی دارایی زیادەڕۆیی دەكەن و ئەو قەرزەی داوایانكردووە زۆرە، چونكە دابەشكردنی موچەی سێ مانگی كۆتایی ئەمساڵ، سەرباری داهات، پێویستی بە شەش تا حەوت ترلیۆن دینارە.”

بە گوتەی ئەو پەرلەمانتارە، دەكرێت حكومەت 10 ترلیۆن دینار قەرزبكات و بەوەش موچە بدات و خەرجییەكانی دیكەش پڕبكاتەوە.

ئەحمەد جبوری ئەمڕۆ دووشەممە 2ی تشرینی دووەم، لێدوانی بۆ میدیاكان داوە و ئاماژەی بۆ ئەوەشكردووە كە “لیژنەی دارایی، چاوەڕوانی حكومەتە ڕوونكردنەوە بدات سەبارەت بەو قەرزەی پێویستییەتی بۆ دەستەبەركردنی موچەی فەرمانبەران و خانەنشینان و سوودمەندبووانی تۆڕی چاودێریی كۆمەڵایەتی.”