لەدوای ئەوەی حکومەتی هەرێم بڕیاریدا بە خەرجکردنی دەرماڵەی پشتیوانیی دارایی بۆ خوێندکاران، بافڵ تاڵەبانی ڕایگەیاند، بە بڕیارەکە خۆشحاڵە و ئەوانیش بەردەوام دەبن لە پشتیگریی خوێندکاران و نۆژەنکردنەوەی بەشەناوخۆییەکان.
بافڵ جەلال تاڵەبانی ڕاشیگەیاندووە، “یەکێتیی نیشتمانیی کوردستان لە 29ی11ی2021 تا ئەمڕۆ کە دوو مانگ و پێنج ڕۆژە بەردەوامە لە نۆژەنکردنەوە و دابینکردنی پێداویستییەکانی بەشەناخۆییەکانی زانکۆ و پەیمانگەکان و پڕکردنەوەی پێداویستییەکانی خوێندنی باڵا و بە دڵنیاییشەوە بەردەوام دەبێت”.
لەبارەی کۆبوونەوەی لەگەڵ خوێندکاراندا بافڵ جەلال تاڵەبانی ڕایگەیاندووە، “بەڵێنی ئەوەتان پێدەدەم سەرەڕای ئەرکەکانم لە بەغداد، بە زووترین کات دەگەڕێمەوە و پێکەوە دادەنیشین و گوێبیستی داواکارییە زانستییەکانتان دەبم و لە ھەوڵەکانمان بەردەوام دەبین لەپێناو ڕیفۆرم لە خوێندن و پێشخستنی خوێندنی باڵا و فەراھەمکردنی کەشێکی لە بارتر بۆتان، تا وەک خوێندکارێکی ئازا و ئازاد خۆتان تەرخانبکەن بۆ خوێندنەکەتان، دڵنیابن لەگەڵتانم و بەجێتان ناھێڵم، خەمی من خەمی پێگەیاندنی نەوەیەکی نوێی پڕ زانیاری و زانستە، کە داھاتووی کۆمەڵگەکەمان بە باشترین شێوە بنیادبنێنەوە”.
ئەمە دەقی بەیاننامەی بافڵ جەلال تاڵەبانی-یە بۆ خوێندکاران
خوێندکارانی ئازیز..
خۆشحاڵم کە دەرماڵەی (پشتیوانیی دارایی) خوێندکاران خەرجدەکرێت، ئەمە مافێکی ڕەواتانە و ئەرکی حکومەتە ژیانێکی باشتر بۆ ئێوە، کە نەوەی ئێستا و داھاتوون، مسۆگەر بکات.
لام ڕوونە لە چ بارودۆخێکی سەختدا دەژین و لە خەمی داھاتووتانن، چەند پەرۆشی تەواوکردنی خوێندن و چاو لە ئاسۆن بۆ داھاتووتان، ڕێگرییەکان ھەرچییەک بن من برا و پشتیوانتانم و لەگەڵتانم بۆ کەمکردنەوەی ئازارەکانتان و ڕەوینەوەی خەمەکانتان.
یەکێتیی نیشتمانیی کوردستان لە 29ی 11ی 2021 تا ئەمڕۆ کە دوو مانگ و پێنج رۆژە بەردەوامە لە نۆژەنکردنەوە و دابینکردنی پێداویستییەکانی بەشەناخۆییەکانی زانکۆ و پەیمانگەکان و پڕکردنەوەی پێداویستییەکانی خوێندنی باڵا و بە دڵنیایشەوە بەردەوام دەبێت.
ئەوەی کردومانە و دەشیکەین مافی خۆتانە، ئەمە منەت نییە، ئێوە شایەنی ئەوەن لەوە زیاتر خزمەتبکرێن و کەشێکی لەبارترتان بۆ بڕەخسێنرێت تا لە ژینگەیەکی ئارامدا بخوێنن و گەشە بەلایەنی زانستیتان بدەن.
بەڵێنی ئەوەتان پێدەدەم سەرەڕای ئەرکەکانم لە بەغدا، بە زووترین کات دەگەڕێمەوە و پێکەوە دادەنیشین و گوێبیستی داواکارییە زانستییەکانتان دەبم و لە ھەوڵەکانمان بەردەوام دەبین لەپێناو ڕیفۆرم لە خوێندن و پێشخستنی خوێندنی باڵا و فەراھەمکردنی کەشێکی لەبارتر بۆتان، تا وەک خوێندکارێکی ئازا و ئازاد خۆتان تەرخانبکەن بۆ خوێندنەکەتان. دڵنیابن لەگەڵتانم و بەجێتان ناھێڵم، خەمی من خەمی پێگەیاندنی نەوەیەکی نوێی پڕ زانیاری و زانستە کە داھاتووی کۆمەڵگەکەمان بە باشترین شێوە بنیادبنێنەوە.
دڵسۆزتان
بافڵ جەلال تاڵەبانی
3ی 2ی 2022 – بەغداد
