دوای ئەوەی وەزارەتی شارەوانی بڕیاریدا لەکاتی گەڕانەوەی قەرزی ئاودا 15% لێخۆشبوون بۆ بەشداربووانی ئاو بکرێت، زیاتر لە سێ هەزار هاوبەش لە سلێمانی لەو بڕیارەی وەزارەت سوودمەند بوون.
سەربەست عوسمان، بەڕێوەبەری ئاوی سلێمانی سەبارەت بە بەدەمەوەهاتنی هاوبەشانی ئاوی شاری سلێمانی لە بڕیارەكە، ڕایگەیاندووە، “تا ئێستا زیاتر لە سێ هەزار هاوڵاتی سەردانی بنکەکانی وەرگرتنی کرێی ئاویان لە شاری سلێمانی کردووە و بە لێخۆشبوونی ڕێژەی 15%ی قەرزی كرێی ئاو سوودمەندبوون لە بڕیارەكەی حکومەت، ڕۆژانە هاوڵاتییان بەشێوەیەكی بەرچاو سەردانی بنکەکانی وەرگرتنی کرێی ئاو دەکەن و سوودمەند دەبن لە بڕیارەكەی حکومەتی هەرێمی كوردستان”.
وەزارەتی شارەوانی و گەشتوگوزار، بڕیاریداوە ئەو لێخۆشبوونە بۆ بەشداربووانی ئاو بەردەوام بێت بۆ ئەوەی هاوڵاتییان قەرزەکانیان بدەنەوە.
لە ماوەی ڕابردوودا پرسی پارەی ئاو لەناو هاوڵاتییاندا زۆرترین کاردانەوەی لای هاوڵاتییان هەبووە، بە تایبەت لەسەر پێوەری زیرەک و ئەو بڕە پارەیەی بۆ بەشداربووانی ئاو دێتەوە.
