لەدوای شەڕی چوار ڕۆژەی حەسەکە و شکستپێهێنانی پیلانێکی داعش بۆ هەڵاتن لە زیندانی غوێران، ئەنجومەنی سوریای دیموکراتی ڕۆژئاوای كوردستان دەڵێت، لەگەڵ بوونی تورکیا کە هەمیشە هەوڵی یارمەتیدانی داعش دەدات، ئەرکی ڕاگرتنی ئەو ژمارە چەکدارە ئاسان نییە.
لە پێنجشەممەی ڕابردووەوە لە حەسەكەی ڕۆژئاوای كوردستان شەڕ لەنێوان هێزەكانی سوریای دیموكرات و چەكدارانی داعش سەریهەڵداوە، دوای ئەوەی پیلانێكی داعش شكستیپێهێنرا بۆ هەڵاتنی چەكدارەكانی لە زیندانی غوێرانی حەسەكە، نزیكەی 300 چەكداری داعش دەستگیركراونەتەوە و سەدانیشیان لێكوژراون.
بەڵام ئه‌نجومه‌نی سوریای دیموكرات “مەسەدە” لە دۆخەكە نیگەرانە و لە ڕاگەیەندراوێكدا دەڵێت، “هه‌ڕه‌شه‌ی داعش له ناوچه‌كانی ڕۆژئاوای كوردستان ڕۆژ له‌دوای ڕۆژ ڕوو له زیادبوون ده‌كات و داوادەکەین هاوكاریی نێوده‌وڵه‌تی زیاتر بكرێت له‌پێناو ڕووبه‌ڕووبوونەوەی ئه‌و مه‌ترسییه”.
مه‌سه‌ده ئاماژه به‌وه‌شده‌دات، سه‌رباری ئه‌وه‌ی هه‌سه‌ده و هێزه‌كانی ئاسایشی ناوخۆ، له‌گه‌ڵ هاوپه‌یمانیی نێوده‌وڵه‌تی ئه‌ركی به‌رپرسیارییه‌تی ئه‌و داعشانه و خێزانه‌كانیان له‌ئه‌ستۆگرتووه، “بەڵام هێشتا پیلانگێڕیی وڵاتانی دراوسێ سه‌باره‌ت به به‌ڕێوه‌به‌رێتیی خۆسه‌ر ڕاناوه‌ستێت”.
ئەنجومەنەكە داواشی کردووە ناوچه‌كانی ڕۆژئاوای كوردستان “له‌و سزایانه دەربهێنرێت كه به‌سه‌ر سوریادا سه‌پێنراون و له ڕووی داراییه‌وه كۆمه‌كی بكرێت و ژێرخانه‌كانی بۆ فه‌راهه‌مبكرێت، له‌پێناو ڕه‌خساندنی ده‌رفه‌تی كار و دوورخستنه‌وه‌ی خه‌ڵكی له بیری ته‌كفیری”.
ماوەی زیاتر لە سێ ساڵە، ئیدارەی خۆسەری دیموکراتی لە ڕۆژئاوای کوردستان داوادەکات وڵاتان ئەو هاوڵاتییانەی خۆیان وەربگرنەوە کە لە ڕیزەکانی داعشدا بوون، بەڵام تا ئێستا چەند وڵاتێکی کەم ئامادەییان دەربڕیووە، ئەوە لەکاتێکدا زیاتر لە 50 ڕەگەزنامەی جیاواز لەناو دەستگیرکراواندان.
تەنها لە کامپی هۆلدا لە ڕۆژئاوا زیاتر لە 72 هەزار ژن و منداڵی داعش بوونیان هەیە و لە بەندینخانەکانی دیکەشدا نزیکەی 10 هەزار چەکداری پێشووتری داعش دەستبەسەرن.
