مەسرور بارزانی بڕیارێكی وەزیری تەندروستیی هەرێمی هەڵوەشاندەوە، كە تایبەتبوو بە وەرگرتنی پارەی پشكنینی كۆرۆنا لە ئیبراهیم خەلیل.
دوو ڕۆژ لەمەوبەر د.سامان بەرزنجی وەزیری تەندروستیی هەرێمی كوردستان بڕیاریدابوو لە بەرامبەر ئەنجامدانی پشكنینی كۆرۆنا بۆ ئەو كەسانەی لە ئیبراهیم خەلیلەوە دێنە هەرێمی كوردستان، 35 دۆلار لە هەر یەكێك وەربگیرێت.
بەڵام تەنها دوای دوو ڕۆژ لەو بڕیارە، مەسرور بارزانی سەرۆكی حكومەتی هەرێمی كوردستان بڕیارەكەی هەڵوەشاندووەتەوە، وەك ئەوەی گوهدار شێخۆ سەرپەرشتیاری ئیدارەی سەربەخۆی زاخۆ ئاشكرایكردووە.
شێخۆ ڕوونكردنەوەیەكی داوە، نووسیویەتی، بە ڕاسپاردەی مەسرور بارزانی سەرۆكی حكومەتی هەرێمی كوردستان، بڕیاری وەرگرتنی 35 دۆلار بۆ هەر پشكنینێكی كۆرۆنا لە دەروازەی نێودەوڵەتیی ئیبراهیم خەلیل هەڵوەشاوەتەوە، كە دوو ڕۆژ پێش ئێستا درابوو.
لەوبارەیەوە شڤان عەبدی ،بەرپرسی ڕاگەیاندنی ئیدارەی سەربەخوی زاخۆ بەتۆڕی میدیایی ئێستای ڕایگەیاند، سەرپەرشتیاری ئیدارەی سەربەخۆی زاخۆ لەگەڵ وەزارەتی تەندروستی سەرقاڵی دانانی میکانیزمێکی نوێن بو مامەڵەکرن لەگەڵ ئەوکەسانەی دێنە ناو هەرێمی کوردستان لە ڕێگەی دەروازەی ئیبراهیم خەلیل.
وتیشی. ئەمڕۆ چۆنێتیی میکانیزمەکە بڕیاری لەسەردەدرێت و ڕایدەگەیەنن.
پێشتر لە بڕیارەكەی وەزیری تەندروستیی هەرێمی كوردستاندا هاتبوو، هەركەسێك بێتە هەرێمی كوردستانەوە لە ئیبراهیم خەلیلەوە، پێویستە پشكنینی كۆرۆنای بۆ بكرێت، ئەگەر كارتی ڤاكسینی هەبێت، یان نا.
