بەڕێوەبەری گشتیی تەندروستیی هەولێر بوونی کێشەی مانەوەی لە نەخۆشخانەی منداڵانی هەولێری پشتڕاستکردەوە و وتی، ئێستا ڕێژەی داخڵبوونی منداڵان ئەوەندە زۆرە، سێ منداڵ لەسەر یەک تەخت دەخەوێنرێن.
لە لێدوانێکدا بۆ تۆڕی میدیایی ئێستا، دکتۆر دلۆڤان خۆشناو بەڕێوەبەری گشتیی تەندروستیی هەولێر ڕایگەیاند، بەهۆی زۆربوونی نەخۆشی لەم وەرزەدا، ژمارەی سەردانکردنی منداڵان بۆ بەشی ڕاوێژکاریی نەخۆشخانەی منداڵان زۆر بەرزە، لەگەڵ ئەوەشدا ڕێژەی داخڵبوونیان زۆرە، بۆیە کێشەی نەبوونی تەختی پێویست دروستبووە لە نەخۆشخانەکە.
دکتۆر دلۆڤان باسیلەوەکرد، ساڵانە لەم وەرزەدا هەمان کێشە دووبارەدەبێتەوە، هۆکارەکەشی زۆربوونی نەخۆشییە لە وەرزی زستاندا و کێشەکە بەگشتی لە مانگەکانی 11، 12 و 1دا دروستدەبێت.
بەڕێوەبەری گشتیی تەندروستیی هەولێر ئاماژەی بەوەکرد، لەبەرئەوەی نەخۆشخانەی منداڵانی هەولێر ئێستا تاکە نەخۆشخانەیە لە شارەکە کە منداڵی تێدا داخڵدەکرێت، بۆیە لەسەر هەر تەختێک سێ منداڵ دەخەوێنرێن، بەڵام کێشەیەکی کاتییە.
سەبارەت بە هەوڵی تەندروستیی هەولێر بۆ چارەسەرکردنی ئەو کێشەیە، دکتۆر دلۆڤان دوو چارەسەری وەک هەنگاوی بەڕێوەبەرایەتییەکەیان ئاشکراکرد، یەکەمیان ئێستا بەردەستە و بەشێکی ڕاوێژکارییە لە بنکەی تەندروستیی شادی، کە لە سەرەتای ئەمساڵەوە کراوەتەوە و تەنها بەیانیان کراوەیە، بەڵام لە چەند ڕۆژی داهاتوودا بە ئێوارانیش تا کاتژمێر 12:00ی شەو کراوە دەبێت.
ڕێگەیەکی دیکەی بەڕێوەبەرایەتیی گشتیی تەندروستیی هەولێر بۆ چارەسەرکردنی کێشەی کەمیی شوێنی مانەوە لە نەخۆشخانەی منداڵان، کردنەوەی بەشێکە لە نەخۆشخانەی ڕاپەڕین لە هەولێر، کە تایبەتە بە داخڵکردنی منداڵ و بەپێی بەڕێوەبەری تەندروستیی هەولێر، زۆرینەی کارەکانی تەواوکراون، تەنها چەند پێداویستییەکی کەمی ماوە، ئەویش لەکۆتایی ئەم مانگە یان سەرەتای مانگی داهاتوو دەکرێتەوە.
دکتۆر دلۆڤان ئاماژەی بەوەشکرد، ئەو دوو چارەسەرە ناتوانن بەتەواوی کێشەکە چارەسەربکەن، بەڵام کەمێک فشاری سەر نەخۆشخانەی منداڵانی هەولێر کەمدەکەنەوە.
