قائیمقامی سلێمانی ڕایگەیاند، وەک هاوخەمییەک بۆ زیانلێکەوتووانی لافاوەکەی هەولێر، هیچ ئاهەنگێکی فەرمیی سەری ساڵ لەلایەن فەرمانگە حکومییەکانەوە ناکرێت و پاڵپشتی ناکرێت.
ئاوات محەمەد، قائیمقامی قەزای ناوەندی سلێمانی لە کۆنگرەیەکی ڕۆژنامەوانیدا، ئامادەکارییەکانی لیژنەی ئەمنیی سلێمانی ڕاگەیاند و وتی، “هێزە ئەمنییەکان لە حاڵەتی ئامادەباشیدا دەبن لەو شوێنانەی خەڵکی تێدا کۆدەبێتەوە و پلان لەوبارەیەوە داڕێژراوە”.
سەبارەت بە لافاو و کۆبوونەوەی ئاو لە سلێمانی، قائیمقامی قەزای ناوەند دڵنیایی دا لەوەی لافاو دروستنەبووە و زیان بە كەس نەگەیشتووە، بەڵام وتی، “هەندێک لە ئاوەڕۆکان بەهۆی کەمتەرخەمیی خەڵکەوە گیراون، هەر کەسێکیش بووبێتە هۆکاری گیرانی ئاوەڕۆیەک و بەهۆیەوە ئاو کۆبووبێتەوە، ڕووبەڕووی یاسا دەکرێتەوە، چونکە ئەو ئاوەڕۆیانە دەبێت وەک ماڵەکان پارێزگارییان لێبکرێت”.
بڕیاری ڕێكنەخستنی ئاهەنگی سەری ساڵ لە سلێمانی، تەنها ئەو ئاهەنگانەن کە حکومەت پشتگیرییان دەکات یان ڕێکیاندەخات، بەڵام ڕێگری لە شوێنە گشتییەكان ناکرێت بۆ ئاهەنگگێڕان.
