ماڵپه‌ڕی گوگڵ لیستى ساڵانه‌ى دیارترین ئه‌و بابه‌تانه‌ی بڵاوكرده‌وه، كه زۆرترین گه‌ڕان بۆكراوه و بابه‌ته‌كانیشی دیاریكردووه.
گوگڵ كه فراوانترین تۆڕه له‌نێو ئینته‌رنێتدا و زۆرترین گه‌ڕان به‌دواى زانیاری و بابه‌تى دیاریكراوی تێدا ئه‌نجامده‌درێت، لیستى ئه‌و بابه‌تانه‌ى ئاشكراكرد كه له ساڵى 2021دا به‌كارهێنه‌ران گه‌ڕانیان بۆكردوون.
ساڵێكى سه‌خت
بەپێی ئامارەكانی گوگڵ، خه‌ڵك له ساڵى 2021دا زۆربه‌ى گەڕانەكانی له ڕێگه‌ى مۆبایله‌وه بۆ بابه‌ته‌كان كردووه و زۆرترین گه‌ڕانیش بۆ بابه‌ته‌كانى كۆرۆنا بوون و گه‌ڕانێكى به‌ربڵاوی بۆكراوه، كه بە “ڕۆحى سه‌رده‌م” ناویبردووه.
باسی له‌وه‌شكردووه، له هه‌موو كاتێك زیاتر گه‌ڕان به‌دواى زانیاریی له‌باره‌ى كۆرۆناوه كراوه.
ته‌ندروستیی خودی
هه‌ر به‌پێی لیسته‌كه‌ى گوگڵ، به‌كارهێنه‌رانى تۆڕی ئینته‌رنێت له‌مساڵه‌دا زۆترین گه‌ڕانیان بۆ ته‌ندروستیی خودى كردووه و ئه‌ویش دواى ئه‌وه‌ى ساڵى ڕابردوو هاوڵاتییان زۆربه‌ى كاتەكان له كه‌ره‌نتینه و ماڵه‌كانیاندا بوون.
لەو چێوەیەدا بەكارهێنەران گه‌ڕانیان بۆ ئه‌وه كردووه كه چۆن ته‌ندروستیی خودییان بپارێزن و ڕێگاكانى چین؟ هه‌روه‌ها كۆكردنه‌وه‌ى زانیاریی ته‌ندروستى لەو بارەیەوە.
گۆڕانی ئاووهه‌وا
یه‌كێكى دیكه له‌و پرسانه‌ى كه له لیسته‌كه‌ى گوگڵدا هاتوون، پرسی كۆكردنه‌وه‌ى زانیاریی بووه له‌باره‌ى گۆڕانی ئاووهه‌واوە، به‌تایبه‌ت دواى سووتانى چه‌ندین دارستان له وڵاتان و لافاو و تسۆنامى، كە له‌مساڵدا ڕوویان له چه‌ند وڵاتێك كرد.
ئه‌وه وایكردووه به‌كارهێنه‌ران گه‌ڕان بكه‌ن بۆ چۆنێتی خۆپاراستن لەو كارەسات و ڕووداوە سروشتییانە و هەوڵدان بۆ درێژەدان بە مانەوە.
كاروباریی دارایی
به‌هۆی ڤایرۆسی كۆرۆناوه هاوڵاتییان له هه‌مووكات زیاتر هه‌ستیان به دڵه‌ڕاوكێ كردووه له بابه‌ته‌كانى كاركردندا و ویستوویانه خۆیشیان له‌و دڵه‌ڕاوكێیه ڕزگاربكه‌ن، بەشێكی زۆری گەڕانەكانیان بۆ دۆزینه‌وه‌ى كارى نوێ و چۆنێتیی دەستخستنی كارێكى نوێ كردووه.
به‌پێی داتاكانى وه‌زاره‌تى كاری ئەمریكا، له ماوه‌ى ساڵى 2021 دا ته‌نها له ئه‌مریكا چوار ملیۆن كه‌س به‌هۆی كۆرۆناوه كاره‌كانیان له‌ده‌ستداوه، بۆیه به‌كارهێنه‌رانى تۆڕه‌كه زۆرترین گه‌ڕانیان كردووه به‌دواى كاردا.
كه‌سایه‌تییه به‌ناوبانگه‌كانى خانه‌واده‌ى شاهانەی به‌ریتانیا
له مانگى ئازارى ئه‌مساڵدا ئۆپرا پێشكه‌شكارى به‌ناوبانگى جیهانى، چاوپێكه‌وتنێكى ته‌له‌ڤیزیۆنى له‌گه‌ڵ شازاده هاری و هاوسه‌ره‌كه‌ى ئه‌نجامدا، ئه‌وه‌ش بوو به یه‌كێك له‌و به‌رنامانه‌ی كه زۆرترین گه‌ڕانیان بۆكراوه بۆ دووبارە سەیركردنەوە.
بەپێی داتاكانى گوگڵ، ئه‌و چاوپێكه‌وتنه‌ى ئۆپرا له‌نێو لیستى زۆرترین گه‌ڕان به‌دواى به‌رنامه‌دا بووه له مێژووى ئه‌و پێگه‌یه‌دا.
سكوید گه‌یم
دراماى “سكوید گه‌یم”ى كۆری كه له نێت فلێكسه‌وه په‌خشكرا، به یه‌كێك له‌و درامایانه دانراوه كه زۆرترین گه‌ڕانیان بۆكراوه و ئەویش له لیسته‌كه‌ى گوگڵدا هاتووه.
