هەپەگە كوشتنی هەشت ئەفسەر و سەربازی توركیای ڕاگەیاند، دەڵێت، گەریلا لە زاپ چالاكیی ئەنجامداوە و گورزی لە سوپای توركیا وەشاندووە، توركیا دانی بە كوژرانی سەربازدا نا، بەڵام ژمارەیەكی كەمتر دەڵێت.
ئەمڕۆ ناوەندی ڕاگەیاندنی هێزەکانی پاراستنی گەل – هەپەگە ڕاگەیەندراوێكی بڵاوكردەوە، ئاشكرایكردووە، دوێنێ و ئەمڕۆ گەریلا لە ناوچەی زاپ ئۆپەراسیۆن و چالاكییان لە دژی سوپای تورکیا ئەنجامداوە و پێكدادان ڕوویداوە.
هەپەگە دەڵێت، لە دوای نیوەڕۆی دوێنێوە چالاكییەكە دەستیپێكردووە تا بەرەبەیانی ئەمڕۆ پێنجشەممە، هەشت ئەفسەر و سەربازی توركیا كوژراون و تەرمەكانیان كەوتوونەتە دەستی گەریلاوە.
ئۆپەراسیۆنەكە بریتی بووە لە هێرشكردنە سەر “گردی شەهید مونزو” لە هەرێمی زاپ لە پێنج قۆڵەوە و چەكی قورسیش بەكارهاتووە، جگە لە كوشتنی هەشت سەرباز و ئەفسەرەكە، دوو سەنگەر خاپوورکراون، دەستیش بەسەر دوو چەکی M-16، یەک بۆمباهاوێژ، یەک BKC و ژمارەیەکی زۆر تەقەمەنی و کەلوپەلی سەربازیدا گیراوە.
لای خۆیەوە وەزارەتی بەرگریی توركیا لە تویتەر كوژرانی سێ سەربازی سوپاكەی لە ئۆپەراسیۆنی “پەنجە بروسك” ڕاگەیاند.
