ئەنجومەنی ئاسایشی ھەرێمی کوردستان دەڵێت، موراد کانی کوردەیی داواكراو بووە و لەكاتی بەجێگەیاندنی ئەركی دەستگیركردنیدا لەلایەن هێزێكی فەرمییەوە، لەگەڵ پاسەوانەكانیدا ڕووبەڕووی ھێزەکە بوونەتەوە، کارمەندێکی ئەمنییان شەهیدكردووە و سێ كەسی دیكەشیان بریندار كردووە.
لە ڕوونكردنەوەیەكی ئەنجومەنی ئاسایشدا هاتووە، سەرلەئێوارەی ئەمڕۆ پێنجشەممە ھێزێکی فەرمی ئەركی دەستگیركردنی داواکراو (موراد کانی کوردەیی) جێبەجێكردووە، بەڵام ناوبراو و پاسەوانەكانی ڕووبەڕووی هێزە فەرمییەكە بوونەتەوە، لە ئەنجامدا کارمەندێکی ئەمنییان شەهیدكردووە و سێ كەسی دیكەشیان بریندار كردووە، موراد کانی کوردەیی و دوو لە پاسەوانەکانیشی دەکوژرێن.
ئەنجومەنی ئاسایشی ھەرێمی کوردستان دووپاتیشی دەكاتەوە، “دەزگا ئەمنییەکان بەدواداچوون دەکەن بۆ دەستگیرکردنی ھەموو ئەو تۆمەتبارانەی پەیوەستن بەم ڕووداوەوە و لە دادگا ھەڵاتوون و سەرجەم تۆمەتباران ڕاپێچی بەردەم دەسەڵاتی دادوەری دەکرێن”.
ڕوونکردنەوەیەک لە ئەنجومەنی ئاسایشی ھەرێمی کوردستانەوە…
سەرلەئێوارەی ئەمڕۆ 25/11/2021 ھێزێکی فەرمی بۆ جێبەجێکردنی بڕیاری دادگا و سەروەریی یاسا بۆ دەستگیرکردنی داواکراو (موراد کانی کوردەیی) لە شاری ڕانیە بەشێوەیەکی مەدەنی و یاسایی ئەرکی دەستگیرکردنی ناوبراویان پێسپێردرا، لەکاتی جێبەجێکردنی بڕیارەکە، موراد کانی کوردەیی و پاسەوانەکانی کە لەگەڵیدا بوون ڕووبەڕووی ھێزەکە دەبنەوە کە لەکاتی ئەرکدا بوون بۆ جێبەجێکردنی سەروەریی یاسا، کارمەندێکی ئەمنی بە ناوی (شامل زرار ئیسماعیل) شەھید دەکەن و سێ کەسی تریش بریندار دەکەن.
لەئەنجامی وەڵام و دەستپێشخەری یاساشکێنان و ھەڵاتووان، موراد کانی کوردەیی و دوو لە پاسەوانەکانی دەکوژرێن.
لێرەوە بۆ ڕای گشتی ڕووندەکەینەوە دەزگا ئەمنییەکان بەدواداچوون دەکەن بۆ دەستگیرکردنی ھەموو ئەو تۆمەتبارانەی پەیوەستن بەم ڕووداوەوە و لە دادگا ھەڵاتوون و سەرجەم تۆمەتباران ڕاپێچی بەردەم دەسەڵاتی دادوەری دەکرێن.
