لەکاتی گردبوونەوەی خوێندکارانی زانکۆ و پەیمانگاکانی هەولێر لەبەردەم بینای وەزارەتی خوێندنی باڵادا، خوێندکاران و پەرلەمانتاران ڕایانگەیاند، لەکاتی چوونیان بەرەو گردبوونەوەكە هێزە ئەمنییەکان هەڕەشەی دەستگیرکردنیان لێکردوون.
بەشێک لەو خوێندکارانە بە تۆڕی میدیایی ئێستایان ڕاگەیاند، “لەلایەن سەرۆکایەتی زانکۆکانەوە ڕێگری لە خوێندکاران دەکرێت تا بچنە گردبوونەوەکە و لە ڕێگاشدا هێزە ئەمنییەکان ڕێگرییان لێکردوون و هەڕەشەی ئەوەیان کردووە، هەرشتێک ڕووبدات ئێوە (خوێندكاران) ڕووبەڕووی دەستگیرکردن دەبنەوە”.
هاوکات دوو پەرلەمانتاری کۆمەڵی دادگەریی کوردستان لەناو خۆپیشاندانی خوێندکارانەوە ڕایانگەیاند، لەکاتی چوونیان بۆ بەردەم بینای وەزارەتی خوێندنی باڵا هێزە ئەمنییەکان هەڕەشەی دەستگیرکردنیان لێکردوون.
هاوکات محێدین حەسەن، سەرۆکی فراکسیۆنی ئازادی لە پەرلەمانی كوردستان، لەناو خۆپیشاندانەکەوە ڕایگەیاند، ئەوەی دەبێت وەڵامدەری خوێندکاران بێت بۆ وەرگرتنەوەی دەرماڵەکانیان وەزارەتی دارایی و ئەنجومەنی وەزیرانە، چونکە ئەنجومەنی وەزیران بڕیارەکەی داوە و دەبێت ئەو بڕیاری خەرجكردنەكە بداتەوە، ڕەتیكردەوە پرسەكە پەیوەندیی بە وەزارەتی خوێندنی باڵاوە هەبێت.
