بەشێک لە خوێندکارانی زانکۆ و پەیمانگاكان لە پارێزگاكانی هەرێمی كوردستان گردبوونەوەی ناڕەزایەتییان ئەنجامدا بۆ گێڕانەوەی دەرماڵەی خوێندکاران.
لە ساڵی 2015 دوای دروستبوونی قەیرانی دارایی، دابەشکردنی دەرماڵەی خوێندکارانی زانکۆ و پەیمانگاکان ڕاگیرا، کە بڕەکەی لە 30 هەزارەوە تا 100 هەزار دیناری عێراقی بوو.
یەکێک لە خوێندکارەکانی ناو گردبوونەوەکە لە شاری هەولێر و لەبەردەم وەزارەتی خوێندنی باڵا بە تۆڕی میدیایی ئێستای وت، “ڕێکخراوە خوێندکارییەکانی ناو زانکۆ ئامادەن بۆ ئاهەنگە حزبییەکان بێن و خوێندکاران کۆبکەنەوە، بەڵام نایەن لەسەر مافی خوێندکاران هیچ هەڵوێستێک نیشانبدەن”.
داواشی لە وەزارەتی خوێندنی باڵا و پەرلەمانی کوردستان کرد بەدەم داواکارییەکەیانەوە بچن و وتی، 48 پەرلەمانتار کار بۆ داواکارییەکەیان دەکەن و “داوادەکەین پەرلەمانتارەکانی دیکەش واژوو لەسەر داواکارییەکەمان بکەن”.
لەلایەکی دیکەوە هەر ئەمڕۆ لە شاری سلێمانی ژمارەیەک لە خوێندکارانی زانکۆ لەسەر شەقامی 60 مەتری بۆ هەمان مەبەست گردبوونەوەیان ئەنجامدا و بۆ ماوەیەک شەقامەکەیان داخست.
یەکێک لە خوێندکارەکانی بەشدار لە گردبوونەوەکە وتی، ئەو دەرماڵەیە هەرچەند کەمیش بێت بۆ خویندکارانی هەژار و کەمدەرامەت دەتوانێت بەشێک لە پێداویستییەکان پڕبكاتەوە، “ئێمە چوار ساڵە لە زانکۆین و دەرماڵەمان پێنەدراوە، کە مافێکی خۆمانە و داوای گەڕاندنەوەی دەکەین”.
هەر ئەمڕۆ لە گەرمیان و ڕاپەڕین بەهەمان شێوە گردبوونەوەی خوێندكاران بۆ گەڕاندنەوەی دەرماڵە بەڕێوەچوو.
