بڕیارە پێشنیوەڕۆی ئەمڕۆ مەکتەبی سیاسیی یەکێتی بە سەرۆکایەتی بافڵ جەلال تاڵەبانی کۆببێتەوە و چەند پرسێکی پەیوەست بە حزبەکە و هەنگاوەكانی چاكسازی، هەروەها هەرێمی كوردستان و پێكهێنانی حكومەتی داهاتووی عێراق تاوتوێ بكات.
بەپێی زانیارییەکان، کۆبوونەوەکە کاتژمێر 11:00ی پێشنیوەڕۆی ئەمڕۆ بەڕێوەدەچێت و تیایدا مەکتەبی سیاسیی یەکێتی بە سەرۆکایەتی بافڵ جەلال تاڵەبانی، پرسی گۆڕانکارییە ناوخۆییەکانی حزبەکە و چاكسازییەكان تاوتوێدەکات.
كۆبوونەوەكە لەكاتێكدایە، پرسی ژەهرخواردكردنی چەند سەركردەیەكی یەكێتی لە ئارادان و بڕیارە ڕێچكەی حزبی و یاسایی خۆیان وەربگرن.
بڕیارە مەکتەبی سیاسیی یەکێتی، لە تەوەرێکی دیکەدا گفتوگۆ لەبارەی پێکهێنانی حکومەتی داهاتووی عێراق بکات، كە لەو چوارچێوەیەدا شاندێكی حزبەكە لەماوەی ڕابردوودا لە بەغداد چەند كۆبوونەوەیەكی لەگەڵ لایەنە عێراقییەكان ئەنجامداوە، بۆ زانینی ڕای ئەو لایەنانە لەبارەی ئەنجامەكانی هەڵبژاردن و پێكهێنانی حكومەتی داهاتووی عێراق.
كۆبوونەوەكەی مەكتەبی سیاسی دوای ڕۆژێك دێت لە كۆبوونەوەی بافڵ جەلال تاڵەبانی و مەسعود بارزانی سەرۆكی پارتی دیموكراتی كوردستان.
