دوو پەرلەمانتاری سویدی داوادەکەن، حکومەتی سوید هەنگاوی نوێ بنێت لەدژی خەتەنەکردنی کچان و توندوتیژیی دژی ژنان و کچان.
بڕیارە لە سوید یاسایەكی نوێی تایبەت بە ڕووبەڕووبوونەوەی توندوتیژییەكانی دژ بە ژنان دەربكرێت، ئامینەی کاکەباوە، پەرلەمانتاری کورد لە پەرلەمانی سوید و مۆرگان جانسۆن داوادەکەن یاسا نوێیەکە سزای قورسی هەبێت بۆ ئەو کەسانەی کۆی توندوتیژییەکان بەرامبەر ڕەگەزی مێ دەکەن، چونکە تا ئێستاش “بەشوودانی منداڵ و خەتەنەی کچان” وەک دیاردە ماون.
ئامینەی کاکەباوە لەوبارەوە ڕایگەیاندووە، “ماوەی حەوت ساڵە خەباتی پەرلەمانیم هەیە دژی ئەو کەسانەی دەیانەوێت کۆنترۆڵی هەستی سێکسیی ژنان بکەن بێوسیتی خۆیان، چونکە ئێستاش دیاردەکە هەیە و دەبینرێت”.
کاکەباوە دەڵێت، “داوامانکردووە هاوشێوەی فەرەنسا، هەر پزیشكێك، کە پەردەی کچێنی بدوورێتەوە بۆ ئامادەکردنی کچەکە پێش هاوسەرگیری، یان خەتەنەی کچان بکات، بڕوانامەکەی لێبسێندرێتەوە و سزابدرێت بۆئەوەی کەسی دیکە نەوێرێت ئەو کارە بکات”.
حکومەتی سوید لەڕێگای دادگایەکی وڵاتەکەوە، دەستیکردووە بە لێکۆڵینەوە لە بوونی ئەو دیاردەیە، کە بۆ “کۆنترۆڵکردنی هەستی سێکسیی کچان” لەڕێگای پزیشكەوە دەگیرێتەبەر.
