لە شەڕی بنەماڵەیەکدا لە ناحیەی لەیلانی سەر بە پارێزگای کەرکوک گەنجێکی تەمەن 19 ساڵ کوژرا و ماڵێکیش سوتێندراوە، بکوژ و کوژراوەکەش کەسوکاری یەکترن.
پەیامنێری تۆڕی میدیایی ئێستا لە کەرکوک ڕایگەیاند، ڕووداوەکە لە گوندی قازانبڵاخ-ی سنووری ناحیەی لەلایەن بووە و کوڕە گەنجەکە لەلایەن مام و ئامۆزایەکیەوە کوژراوە.
دوای ئەو ڕووداوی کوشتنە، کەسوکاری کوژراوەکە هێرشیانکردووەتە سەر ماڵی بکوژەکە و ماڵەکەیان سووتاندووە.
پۆلیسی ناحیەی لەیلان لەسەر ڕووداوەکە بە تۆڕی میدیایی ئێستای ڕاگەیاند، ڕووداوەکە بەهۆی کێشەی مەڕوماڵاتەوە ڕوویداوە، چەند جارێکی تریش ئاڵۆزی و شەڕ لەنێوان دووماڵەکە ڕوویداوە، بەڵام بەهۆی چارەسەرنەکردنی کێشەکان لە ڕەگەوە، ئەم ڕووداوەی لێکەوتووەتەوە.
