پەرلەمانی كوردستان پرساندنی سەرۆكی حكومەت و جێگرەكەی و وەڵامەكانیان تاووتوێدەكات

هۆڵی پەرلەمانی کوردستان

بڕیارە ڕۆژی سێشەممە پەرلەمانی كوردستان دانیشتنی ئاسایی خۆی بۆ خوێندنەوەی ژمارەیەك پڕۆژەیاسا ئەنجامبدات و بەپێی بەرنامەی كاریش پرساندن و وه‌ڵامه‌كانی سه‌رۆكی حكومەت و جێگرەكەی و وەزیری دارایی گفتوگۆی لەسەر دەكرێت.

ڕێواز فایەق، سه‌رۆكی په‌رله‌مانی كوردستان ئەمڕۆ یەكشەمە 25ی تشرینی یەكەم بانگهێشتی ئاراستەی گشت ئه‌ندامانی په‌رله‌مان كرد بۆ ئاماده‌بوون له ‌دانیشتنی ژماره‌ (9)ی ئاسایی خولی پایزه‌ی ساڵی دووه‌م له ‌خولی هه‌ڵبژاردنی پێنجه‌می په‌رله‌مانی كوردستان.

بەپێی بانگێشتەكە دانیشتنەكە له ‌كاتژمێر 2ى پاشنیوه‌ڕۆی رۆژی سێشه‌ممه‌ ڕێكه‌وتی 2020/10/27 دەبێت.

هەروەك دەستەی سەرۆكایەتی پەرلەمان بەرنامەی كاری دانیشتنەكەی بڵاوكردەوە و تیایدا جگە لە خوێندنەوە بۆ دوو پڕۆژەیاسا، گفتوگۆی پرساندن و وه‌ڵامه‌كانی مەسرور بارزانی، سه‌رۆكی حكومەتی هەرێمی كوردستان و قوباد تاڵەبانی، جێگری سه‌رۆك و ئاوات شێخ جەناب، وه‌زیری دارایی و ئابووری به‌پێی حوكمی مادده‌كانی (70، 71، 73) له‌ په‌یڕه‌وی ناوخۆی په‌رله‌مان دەكرێت.

دەقی به‌رنامه‌ی كار:
به‌پێی حوكمی مادده‌ی (5)و بڕگه‌كانی (یه‌كه‌م و دووه‌م و سێیه‌م) له‌مادده‌ی (16)و بڕگه‌ی (سێیه‌م) له‌مادده‌ی (18)و بڕگه‌كانی (یه‌كه‌م و دووه‌م و سێیه‌م و چواره‌م و پێنجه‌م) له‌مادده‌ی (20)و مادده‌كانی (47، 48، 52، 54، 55، 56، 57)، له‌په‌یڕه‌وی ناوخۆی په‌رله‌مانی كوردستان-عێراق، ده‌سته‌ی سه‌رۆكایه‌تیی په‌رله‌مان بڕیاریدا به‌رنامه‌ی كاری دانیشتنی ژماره‌ (9)ی ئاسایی خولی پایزه‌ی ساڵی دووه‌م له خولی پێنجه‌می هه‌ڵبژاردنی په‌رله‌مان له‌كاتژمێر (2)ی دوای نیوه‌ڕۆى رۆژی سێشه‌ممه‌‌ رێكه‌وتی 27/10/2020، به‌مشێوه‌یه‌ بێت:
یه‌كه‌م: خوێندنه‌وه‌ی یه‌كه‌م بۆ ئه‌م پێشنیازه‌یاساییانه‌ی خواره‌وه‌ پشت به‌ستن به‌حوكمی مادده‌كانی (79، 80)ی په‌یڕه‌وی ناوخۆی په‌رله‌مانی كوردستان.
1ـ پێشنیازی یاسای (پاراستنی تۆڕو بنچینه‌كانی ئاوو ئاوه‌ڕۆ له‌هه‌رێمی كوردستان-عێراق).
2ـ پێشنیازی یاسای (به‌رێوه‌بردن و پاراستنی ئاو له‌هه‌رێمی كوردستان-عێراق).
دووه‌م: دانانی ئه‌ندامی په‌رله‌مان به‌رێز (عمر عبدالله فتاح) له‌لیژنه‌ی دارایی و كاروباری ئابووری به‌پێی حوكمی مادده‌كانی (28، 34) له‌په‌یڕه‌وی ناوخۆی په‌رله‌مانی كوردستان.
سێیه‌م: گفتوگۆی پرساندن و وه‌ڵامه‌كانی به‌رێزان (سه‌رۆكی ئه‌نجوومه‌نی وه‌زیران) و (جێگری سه‌رۆكی ئه‌نجوومه‌نی وه‌زیران) و (وه‌زیری دارایی و ئابووری)، به‌پێی حوكمی مادده‌كانی (70، 71، 73) له‌په‌یڕه‌وی ناوخۆی په‌رله‌مانی كوردستان.

 


بابەتی پێشتر

پێنج پرۆژەی کارەبا لە پارێزگای سلێمانی بە بڕی زیاتر لە 181 ملیۆن دینار جێبەجێ دەكرێن

بابەتی دواتر

هەڵەبجە لە یاسای هەڵبژاردنەكان نازناوی پارێزگای لێسەندراوەتەوە

بابەتی پەیوەندیدار
Total
0
Share