تەقەكردن لە خۆپیشاندانێكدا لە سلێمانی ژمارەیەك برینداری لێكەوتەوە

بەهۆی پێكداهەڵپژان لەنێوان هێزە ئەمنییەكان و ژمارەیەك هاوڵاتی لە گوندی تووەسپی، ژمارەیەك هاوڵاتی و كارمەندی هێزە ئەمنییەكان برینداربوون.

بەپێی وتەی شایەتحاڵان بۆ تۆڕی میدیایی ئێستا، ئێوارەی ئەمڕۆ هێزێكی ئەمنیی سلێمانی بۆ ڕووخاندنی ژمارەیەك خانووی زیادەڕەو چوونەتە گوندی تووەسپی، بەڵام لەلایەن خاوەن خانووەكان و دانیشتووانی گوندەكەوە ڕێگری لە هێزە ئەمنییەكە كراوە.

دواتر بەشێك لە دانیشتوانی گوندەكە، كە بەشێكی زۆری خانووەكانی زیادەڕەون و بەبێ نەخشە و ڕێگەپێدان دروستكراون، خۆپیشاندانیان ئەنجامداوە و بەهۆی ڕووبەڕووبوونەوە و پێكداهەڵپژانیشەوە ژمارەیەك هاوڵاتی و كارمەندی هێزە ئەمنییەكان برینداربوون، كە لە نێوانیاندا عەمید ئاری ڕەئوف، بەڕێوەبەری پۆلیسی دارستانی سلێمانی هەیە، وەك ئەوەی شایەتحاڵێك ئاماژەی پێدا.

گوندەكە دەكەوێتە نزیكەی 10 كیلۆمەتر لە باكووری ڕۆژئاوای سلێمانی و نزیكبووەتەوە لە گەڕەكەكانی سلێمانی.

سامان نادر، بەڕێوەبەری سەنتەری فریاکەوتنی خێرای سلێمانی بۆ تۆڕی میدیایی ئێستا پێكداهەڵپژانەكەی پشتڕاستكردەوە، بەڵام دەربارەی بریندار و قوربانییان ئاماژەی بەوەكرد هیچ زانیارییەكی لانییە.

بابەتی پێشتر

چوار لیوای دیكه‌ لە یەکەکانی 70 و 80 دەخرێنەوه‌ سەر وەزارەتی پێشمەرگە

بابەتی دواتر

دژه‌تیرۆر دانپێدانانی"تیرۆرستێك"ی بڵاوکردەوە

بابەتی پەیوەندیدار
Total
7
Share