وەزیری كشتوكاڵ: بۆ دروستكردنی بەنداوەكان داوای زیاتر لە 126 ملیار دینار كراوە

بێگەرد تاڵەبانی، وەزیری كشتوكاڵ و سەرچاوەكانی ئاو

وەزیری كشتوكاڵی هەرێم ڕایدەگەیەنێت، بۆ تەواوكردن و دروستكردنی بەنداو داوای زیاتر لە 126 ملیار دیناریان كردووە و دەشڵێت، وەك قۆناغی یەكەم بڕی 16 ملیار دینار دابینكراوە.

بێگەرد تاڵەبانی، وەزیری كشتوكاڵ و سەرچاوەكانی ئاو ڕایگەیاند، لە نووسراوێكیاندا بۆ ئەنجومەنی وەزیران داوای تەرخانكردنی بودجەیەكیان كردووە بە بڕی 126 ملیار و 751 ملیۆن و 449 هەزار و 563 دینار.

وتیشی، لەلایەن سەرۆكایەتیی ئەنجومەنی وەزیران لە قۆناغی یەكەمدا ڕەزامەندی درا لەسەر “دابینکردنی بەشێکی پارەی خەمڵێندراوی پێویست لەپێناو بەردەوامیدان بەو پڕۆژانە و دەستکردنەوە بە هەنگاوەکانی بونیادنانی بەنداوەکان بەپێی پێشینەی پڕۆژەکان”.

ڕەزامەندییەكە لەسەر بڕی 16 ملیار دینارە بۆ تەواوکردن و دروستکردنی بەنداوەکانی (زەلان، چەقچەق و گۆمەسپان) كە بەشێوەی نەختینە و قۆناغ بە قۆناغ لەسەر بودجەی وەبەرهێنانی وەزارەتی کشتوکاڵ دەبێت.

بێگەرد تاڵەبانی ڕوونیشیكردەوە، لە پارێزگای هەولێریش ڕەزامەندی دراوە بۆ جێبه‌جێكردنی پڕۆژه‌ی به‌نداوی (به‌ستۆڕه‌) دوابەدوای ئاماده‌كردنی ده‌رخسته‌ و دیزاینی پڕۆژه‌كه‌.

ئاماژەشدەدات بەوەی دروستکردن و تەواوکردنی ئەم بەنداوانە هاوتەریبە لەگەڵ پرۆسەی هەڵسەنگاندنی داخوازیی کۆمپانیاکانی وەبەرهێنان و بونیادنانی بەنداوەکان و پڕۆژەکانی ئاودێری، بەتایبەتی بۆ 9 بەنداوە ستراتیژییەکانی هەرێمی کوردستان بەپێی سیستمی (ppp) کە بۆ یەکەمجار لەڕێگەی وەزارەتی کشتوکاڵەوە سەرپەرشتیدەکرێت.

دوێنێ فەرمانگەی میدیا و زانیاریی حكومەتی هەرێمی كوردستان ڕایگەیاند، ڕەزامەندی دراوە لەسەر ته‌رخانكردن و خه‌رجكردنی شه‌ش ملیار دینار بۆ به‌نداوه‌كانی زه‌لان و چه‌قچه‌ق لە سلێمانی.

بەنداوی چەقچەق دەکەوێتە باکووری ھاوینەھەواری سەرچنارەوە بە دووریی یەك کیلۆمەتر. بەرزییەکەی 13 مەترە و لە ساڵی 2002 لەلایەن ڕێکخراوی قەندیلی سویدییەوە دروستکرا و لە ساڵی 2006 دوای چەند ڕۆژێک لە تەواوبوونی بەھۆی بارانبارینێکی زۆرەوە ھەرەسیھێنا.

هاوكات فەرمانگەی میدیا ئاشكرایكرد، لە هەولێریش دەست بە جێبه‌جێكردنی پڕۆژه‌ی به‌نداوی به‌ستۆڕه‌ ده‌كرێت، بۆ ئه‌و مه‌به‌سته‌ش داوای ئاماده‌كردنی ده‌رخسته‌ و دیزاینی پڕۆژه‌كه‌ كراوە و له‌سه‌ر بودجه‌ی وه‌به‌رهێنانی وه‌زاره‌تی كشتوكاڵ گوژمه‌ی تایبه‌ت به‌ ئه‌نجامدانی پڕۆژه‌كه‌ ته‌رخانده‌كرێت.

ڕۆژێك پێشتریش حكومه‌تی هه‌رێم ڕەزامەندی نیشاندا لەسەر تەرخانكردنی 10 ملیار دینار به‌مه‌به‌ستی ده‌ستپێكردنه‌وه‌ی پڕۆژه‌ی به‌نداوی (گۆمه‌سپان) له‌ هه‌ولێر.

بابەتی پێشتر

بافڵ تاڵەبانی: یەکێتی لەسەر بنەمای بەرژەوەندیی نەتەوەیی و نیشتمانی بڕیاردەدات

بابەتی دواتر

هەولێر.. چوار كەس بە تۆمەتێكی كوشتن دەستگیركران

بابەتی پەیوەندیدار
Total
1
Share