بەرپرسێكی حكومەتی دیمەشق ڕایدەگەیەنێت، وڵاتەكەی ئەو مافەی دەستوور و یاسای سوریا فەراهەمیكردووە بەكاردەهێنێت بۆ وەڵامدانەوەی “هەڵسوكەوتە دوژمنكارییەكانی توركیا” و سنووردانان بۆی.
سەرچاوەیەكی بەرپرس لە وەزارەتی دەرەوەی سوریا لە لێدوانێكی ڕۆژنامەوانیدا بۆ ئاژانسی فەرمیی سوریا “سانا” ڕایگەیاند، سوریا سەرجەم بەرپرسیارێتییە یاسایی و سیاسی و داراییەكان كە بنەماكانی یاسای نێودەوڵەتیی پەیوەندیدار دیاریكردووە، دەخاتە ئەستۆی دەسەڵاتدارێتی توركیا.
وتیشی، “سوریا هەڵسوكەوتە دوژمنكارییەكانی توركیا و پێشێلكردنی خاكەكەی ئیدانە دەكات، بە كارێكی دوژمنكارانە و پێشێلی سەروەری و سەربەخۆییەكەی و بەشێك لە سیاسەتی دوژمنكارانە ناودەبات، كە زیاتر لە 10 ساڵە ڕژێمی توركیا پەیڕەوی دەكات”.
سەرچاوە بەرپرسەكە دووپاتیشیكردەوە، سوریا داوا لە ئەمینداری گشتیی نەتەوە یەكگرتووەكان و ئەنجومەنی ئاسایش دەكات هەڵوێستێكی ڕوون و ڕاشكاو بەرامبەر هەڵسوكەوتە دوژمنكارییەكانی ڕژێمی توركیا نیشابدات، كە گونجاو بێت لەگەڵ بڕیارەكانی ئەنجومەنی ئاسایش پەیوەندیدار بە دۆخی سوریا، كە جەختدەكاتەوە لەسەر ڕێزگرتن لە سەروەری و سەربەخۆیی و سەلامەتی و یەكێتیی خاكەكەی.
لەدوای ڕووداوەكانی بەهاری عەرەبی و سەرهەڵدانی خۆپیشاندان و دواتریش پێكدادانە چەكدارییەكان لە سوریا، توركیا بە ڕاستەوخۆ لەڕێی هێرشی زەمینی و ئاسمانی و ناڕاستەوخۆش لەڕێی ئەو گروپە چەكدارییانەی پشتیوانییان دەكات، بەردەوامە لە دەستێوەردان لە كاروباری ناوخۆی ڕۆژئاوای كوردستان (باكووری ڕۆژهەڵاتی سوریا) و ناوچەكانی دیكەی ئەو وڵاتە.
س: ئاژانسی سانا + RT
