ئەندامێكی پەرلەمانی كوردستان ڕایدەگەیەنێت، 16 ئەندامی حزبی ماوەی دوو ساڵە لە زیندانی ئاسایشی هەولێر دەستگیركراون و تائێستا دادگایینەكراون.
عەلی حەمەساڵح، ئەندامی پەرلەمانی كوردستان لە بەدواداچوونێكدا ئاشكرایكردووە، “ئەمڕۆ یەكشەممە بەدواداچوونیان بۆ دۆسیەی 16 کەس كردووە كە ئەندامی حزبین و زیاتر لە دوو ساڵە لە زیندانی ئاسایشن لە ھەولێر و دادگایینەکراون”.
ئەو پەرلەمانتارە دەشڵێت، “ئاسایش بە كەسوكارەكانی وتووە تۆمەتەکەیان ئەوەیە کاریان بۆ حزبێکی تر کردووە بەنھێنی، دەشڵێن، ھیچ بەڵگەیەکیان لەسەر نییە، کە سیخوڕبن.”
عەلی حەمەساڵح پێشیوایە، “ناکرێت بەبێ دادگاییكردن ھیچ کەسێک زیاتر لە دوو ساڵ لە زینداندابێت”.
ئەندامەكەی پەرلەمانی كوردستان جەختیكردووەتەوە، لە بەدواداچوون بەردەوام دەبن بۆ چارەسەركردنی ئەو پرسە.
