شەوی ڕابردوو لەکاتی گەیشتنی هێزە ئەمنییەکان بە کۆمەڵێک کۆڵبەری کورد لە سنووری نۆدشە لە ڕۆژهەڵاتی کوردستان، کۆڵبەرێکی کورد جەڵتەی دڵ لێیدا و گیانیلەدەستدا.
ئەو کۆڵبەرە کوردە ناوی “شەوکەت قوربانی” بووە و لە سنووری “زاوەر”ی سەر بە “نۆدشە” لە هەورامانی ڕۆژهەڵات کەوتووەتە بۆسەی هێزەکانی سەرسنوری ئێرانەوە، بەهۆی دڵەڕاوکێوە جەڵتەی دڵ لێیداوە.
ڕێکخراوەکانی مافی مرۆڤ ئاشكرایانكردووە، ئەفسەرێکی ئەو هێزانە بەناوی “سەعید جەمالی” ڕێگرییکردووە کە تیمی فریاگوزاری بگاتە سەر شەوکەوت قوربانی و چارەسەری بۆ ئەنجامبدات، بۆیە گیانیلەدەستداوە.
بەپێی زانیارییەکان، ئەو کۆڵبەرانە بەنزینیان پێبووە و خودی شەوکەت قوربانی سێ دەبە بەنزینی پێبووە.
ئەو کۆڵبەرە تەمەنی 45ساڵ و باوکی سێ منداڵ بووە، هەروەها یەکێک بووە لە دانیشتووانی گوندی زاوەر لە دەوروبەری نۆدشەی سەر بە شاری پاوە.
