دەزگای زانیاری: تۆمەتباری تاوانەکانى چەند ڕۆژی ڕابردووی سلێمانی دەستگیرکرا

“بەزووترین کات بەڵگە و دانپێدانان دەخەینە بەردەم ڕاى گشتى”

بەڕێوەبەری دەزگای زانیاری ڕایدەگەیەنێت، تۆمەتباری تاوانەکانى چەند ڕۆژی ڕابردووی سلێمانی دەستگیرکرا.

ئەژی ئەمین، بەڕێوەبەری ئاژانسی پاراستن و زانیاری/ زانیاری لە پەیجی خۆی بڵاویكردەوە، “تاوانبارى تاوانەکانى چەند ڕۆژی ڕابردوو دەستگیرکرا و ڕاپێچى بەردەم یاسامان کرد”.

دەشڵێت، “بەزووترین کات بەڵگە و دانپێدانان دەخەینە بەردەم ڕاى گشتى”.

دوێنێ (شوکری سەرحەد) ئەندامی کۆمیتەی ماڵباتی شەهیدانی پارتی كرێكارانی كوردستان (پەکەکە)، لە گەڕەکی چوارچرا لە سلێمانی لەلایەن کەسێکی نەناسراوە تەقەی لێکراوە و کوژرا.

ڕۆژێك پێشتریش لایەنگرێكی دیكەی پەكەكە بەناوی “فەرهاد بارش” کرایە ئامانج و بریندارکرا.

بەڕێوەبەری زانیاری بەو بۆنەیەوە دەستخۆشی لە هێزەكانی ئاسایش، دژەتیرۆر و پۆلیس دەكات.

هەر دوێنێ بەڕێوەبەرایەتیی گشتیی دژەتیرۆری سلێمانی ڕاگەیەنراوێكی بڵاوكردەوە و تیایدا دەڵێت، “سەبارەت بە ڕووداوە نەخوازراوەکانی 48 کاتژمێری ڕابردووی شاری سلێمانی، پاڵپشت بە دۆکۆمێنت و زانیاریی تایبەت سەرەداوی وردمان دەربارەی ئەو ڕووداوانە دەستکەوتووە”.

دڵنیایش دەداتە هاوڵاتییانی هەرێمی کوردستان و شاری سلێمانی کە پاش یەکلاییکردنەوە و پشتڕاستکردنەوەی بەڵگەکان ئەنجامەکان بۆ ڕای گشتی بڵاودەکەنەوە.

جەختدەکاتەوە، کە شاری سلێمانی هەمیشە وەک لانکەی فرەدەنگی و ئارامی دەمێنێتەوە و دەڵێت، “هیچ پیلانگێڕییەک سلێمانی و دەزگا ئەمنییەکانی بەلاڕێدا نابات”.

بابەتی پێشتر

یونسێف: 10 ملیۆن منداڵی ئەفغانستان پێویستیان بە هاوكاریی مرۆییە

بابەتی دواتر

ئەگەری هێرش بۆسەر هەسەدە هەیە<br> گروپ و میلیشیاكان دژ بە ڕۆژئاوای كوردستان یەكدەخرێن

بابەتی پەیوەندیدار