ئەمڕۆ هەینی فەڵەستینییەكان لە چەند ناوچەیەك خۆپیشاندانیان كرد و سوپای ئیسرائیل ڕووبەڕوویان بووەوە.
بەپێی مانگی سووری فەڵەستینی، لە شارۆچكەی بیتا ڕووبەڕووبوونەوە و پێكدادان لەنێوان خۆپیشاندەرانی فەڵەستینی و سوپای ئیسرائیلدا ڕوویداوە و بەهۆیەوە 46 فەڵەستینی برینداربوون.
مانگی سووری فەڵەستینی ئێوارەی ئەمڕۆ ڕاگەیەندراوێكی بڵاوكردەوە و ئاشكرایكرد، شەش خۆپیشاندەر بە گولـلەی پلاستیكی برینداربوون و 40 خۆپیشاندەری تریش بەهۆی لێدان و كەوتن و بەكارهێنانی گازی فرمێسكڕێژ لەلایەن هێزەكانی ئیسرائیلەوە، براونەتە نەخۆشخانە.
سەرچاوەكانی هەواڵی فەڵەستین بڵاویانكردەوە، خۆپیشاندانەكە لەلایەن سەدان كەسەوە ڕێكخراوە و پشتیوانی بووە لە زیندانییانی فەڵەستینی و هاوكات دەربڕینی ناڕەزایی بووە بەرامبەر بە نیشتەجێكردنی جوولەكە لە هەندێك ناوچەدا.
