بەهۆی وەرگەڕانی ئۆتۆمبێلەكەوە لەسەر ڕێگای هەڵەبجە-سەیدسادق، دوو كەس گیانیان لەدەستدا كە یەكێكیان منداڵێكی تەمەن نۆ ساڵانە.
لە ڕاگەیەندراوێكدا ئەمڕۆ شەممە 24ی تشرینی یەكەم پۆلیسی هاتوچۆی پارێزگای هەڵەبجە ڕایگەیاندووە، “كەمێك پێش ئێستا لە ئەنجامی وەرگەڕانی ئۆتۆمبێلێكی جۆری مۆنیکا لەسەر ڕێگای دووسایدی هەڵەبجە-سەیدسادق نزیک گوندی قاجر دوو كەس گیانیان لەدەستداوە و كەسێكیش بریندار بووە”.
لە ڕاگەیەندراوەكەدا هاتووە، ئەوانەی گیانیان لەدەستداوە یەكێكیان شوفێری ئۆتۆمبێلەکە بووە كە تەمەنی 64 ساڵە ئەوی دیكەشیان منداڵێكی نۆ ساڵانە كە سەرنشینی ئۆتۆمبێلەكە بووە.
هاتوچۆی هەڵەبجە ئەوەشی ئاشكراكردووە، منداڵەكە كچەزای شۆفێرەكە بووە و دانیشتووی سلێمانی-ن، تەرمەکانیان ڕەوانەی پزیشکی دادوەریی پارێزگای هەڵەبجە کراوە، هاوسەری شۆفێرەكەش كە لەناو ئۆتۆمبێلەكە بووە بە سەختی بریندار بووە.
