هەژماری تایبەتی وەزارەتی بەرگریی تورکیا، ڕۆژانە ڤیدیۆی جۆرێک بۆردومانکردنی خاکی هەرێم بڵاودەکاتەوە و لەگەڵیشیدا ئامارێک سەبارەت بە کوژرانی گەریلاکانی پەکەکە بڵاودەکاتەوە، ئەگەرچی ئامارەکان لەلایەن پەکەکەوە ڕەتدەکرێنەوە.
وەزارەتی بەرگریی تورکیا بەشێکی زۆری چالاکییەکانی پەیوەستکردووە بە بۆردومانکردنی هەرێمی کوردستان و بە وردبوونەوە لە پۆستەکانی تۆڕی کۆمەڵایەتی تیوتەری ئەو وەزارەتە دەردەکەوێت زیاتر لە %50ی چالاکییەکان بۆردومانکردنی خاکی هەرێمە.
وەزارەتی بەرگریی تورکیا ڤیدیۆی چەندین شێواز بۆردومانی خاکی هەرێم بڵاودەکاتەوە، لەوانە بۆردوومان بە فڕۆکەی جەنگی، یاخود فڕۆکەی بێفڕۆکەوان یان بۆردومان لەلایەن تۆپخانەکانەوە.
لەماوەی شەش ساڵی ڕابردوودا لانیکەم هەفتەی یەکجار یان زیاتر سنورەکانی هەرێمی کوردستان یاخود هەندێکجار بە قوڵایی لەناو خاکی هەرێمدا بۆردومانکراوە.
ساڵانە لەلایەن سوپای تورکیاوە بەبیانووی گەریلاکانی پەکەکە، چەندین هاوڵاتیی کورد دەکوژرێن و برینداردەکرێن، لەگەڵ ئەوەشدا ئەو پرسە بەبێ دەنگی دەمێنێتەوە.
