بزوتنەوەی تاڵیبان ڕایدەگەیەنێت، لە داهاتوودا ڕێگە بە ئافرەتان دەدەن، كە لە پۆستە حكومییەكاندابن.
زەبیحوڵڵا موجاهید، وتەبێژی بزوتنەوەی تاڵیبان ڕایگەیاندووە، “ئەم حكومەتەی كە ئێستا ڕاگەیەنراوە كاتییە و لە داهاتوودا ڕێگە بە ئافرەتان دەدەین لە پۆستەكاندا بن، بەپێی بنەماكانی شەریعەت و ئاینیی ئیسلام”.
وتەبێژەكەی تاڵیبان جەختی لەوەشكردووە، “ئێستا سەرەتایە، بەڵام لە قۆناغی دووەمدا مافی هێنانە پێشەوەی ئافرەتان بۆ نێو حكومەت فەراهەم دەكەین و ئەم حكومەتەشی كە ڕاگەیەندراوە كاتییە”.
ئەو قسانەی زەبیحوڵڵا موجاهید دوای ئەوەدێت، لە چەند ڕۆژی پێشوو تاڵیبان حكومەتی كاتیی ئەفغانستانی ڕاگەیاند، بە بێئەوەی هیچ ئافرەتێك كاندیدكرابێت بۆ پۆستە وەزارییەكان.
هاوكات نەتەوەیەكگرتووەكان و ڕێكخراوەكانیش داوایان لە بزوتنەوەكە كرد، ڕێز لەمافی ئافرەتان و و مافی مرۆڤ بگرێت.
