وەزیری دەرەوەی لیتوانیا لەبارەی پەنابەرە عێراقییەکانەوە ڕایگەیاند، گفوگۆیان لەگەڵ بەغداد بەردەوامە و هەر پەنابەرێک خۆی دیپۆرتبکاتەوە 300 یۆرۆ وەردەگرێت.
گابریلوس لاندبێرگیس، وەزیری دەرەوەی لیتوانیا لە کۆنگرەیەکی ڕۆژنامەوانیدا ڕایگەیاند، “بڕیارە دیبلۆماتکارێک بنێرینە بەغداد بۆ گفتوگۆ و لێکتێگەیشتنی زیاتر لەگەڵ حکومەتی عێراق سەبارەت بە پەنابەران.”
ئاماژەشی بەوەکرد، “جێگای دڵخۆشییە بەشێک لە پەنابەران داوای خۆدیپۆرتکردنەوە دەکەن و هەرکەسێکیش خۆی دیپۆرت بکاتەوە بڕێک هاوکاریی مادی دەکرێت.”
هاوکات وەزارەتی ناوخۆی لیتوانیا ڕایگەیاندووە، “لەناو پەنابەراندا کەسێک هەیە، کە پەیوەندی بە ڕێکخراوە تیرۆرستییەکانەوە هەبووە و ئێستا لەژێر چاودێریدایە و ڕێگای نادرێت لیتوانیا جێبهێڵێت.”
پێشتر حکومەتی عێراق و لیتوانیا ڕێککەوتنیانکرد بۆ دیپۆرتکردنەوەی زیاتر لە چوار هەزار پەنابەری عێراقی، بەڵام پڕۆسەی دیپۆرتکردنەوەکە بە خاوی بەڕێوەدەچێت.
بەپێی ئامارەکان تا ئێستا چوار هەزار و 100 عێراقی لە کامپی Rudninkai نیشتەجێن لەسەر سنوری وڵاتی لیتوانیا و بێلاڕوسیا.
