جموجوڵی ھاتوچۆ لەناو شاری سلێمانی بەپێی پلانێکی نوێ ڕێکدەخرێتەوە و لە شەقامەكانی شارەکەدا ڕێگریدەکرێت لە زیادەڕۆیی و ڕاگرتنی ئۆتۆمبێل لە شوێنی قەدەغەکراو.
بەگوێرەی ڕاگەیەندراوێكی بەشی ڕاگەیاندنی قائیمقامیەتی سلێمانی، ئامانج لە گۆڕانکارییەکان ڕێخستنەوەی سیستمی ھاتوچۆ و کارئاسانییە بۆ ھاوڵاتییان و کاسبکاران .
بڕیاری پەیڕەوكردنی ئەو پلانە، لە كۆبوونەوەیەكدا دراوە كە ئەمڕۆ پێنجشەممە لە دیوانی قائیمقامیەتی سلێمانی بە سەرپەرشتیی ئاوات محەمەد قائیمقامی سلێمانی بەڕێوەچووە بە ئامادەبوونی عەمید- فازڵ نامیق بەڕێوەبەری نوێی ھاتوچۆی ڕۆژئاوای ناوشاری سلێمانی و عەمید- فایەق خدر بەڕێوەبەری نوێی ھاتوچۆی ڕۆژھەڵاتی ناوشاری سلێمانی و لێپرسراوی بەشی زیادەڕۆیی لە شارەوانیی سلێمانی و بەرپرسانی دیکەی پەیوەندیدار.
بەپێی پلانە نوێیەکە، تیمەکانی ھاتوچۆ بەھەماھەنگی لەگەڵ ھێزەکانی پۆلیس و تیمەکانی شارەوانی و فەرمانگە پەیوەندیدارەکان، کاردەکەن بۆ لابردنی ئەو ئاستەنگانەی کە لەسەر شەقامەکان بەھۆی ڕاگرتنی ئۆتۆمبێل بەشێوەی نایاسایی و زیادەڕۆییەکانەوە دروستدەبن.
