ماوەی چەند مانگێکە بەهۆی نەبوونی بودجەی پێویست بۆ کارمەندان و پزیشکانی نەخۆشخانەی ئاسا، نەخۆشخانەکە داخراوە، لەسەر ڕاسپاردەی بافڵ تاڵەبانی بودجە بۆ نەخۆشخانەکە تەرخانکراوە و لەچەند ڕۆژی داهاتوودا دەکرێتەوە.
دکتۆر شەماڵ جەبار یاوەر بەڕێوەبەری دەزگای تەندروستیی پێشمەرگە بە تۆڕی میدیایی ئێستای وت، “نەخۆشخانەکەمان یەکەمین نەخۆشخانەیە لەسەر ئاستی هەرێمی کوردستان بۆ نەخۆشانی کۆرۆنا کرایەوە و لەماوەی تەنها 10 ڕۆژدا دروستکرا”.
لە نەخۆشخانەی ئاسای تایبەت بە کۆرۆنا ژمارەیەک کارمەند و پزیشکی خۆبەخش کاردەکەن، ماوەی چەند مانگێکە ئەو پزیشک و کارمەندانە هیچ شایستەیەکیان پێنەدراوە و نەخۆشخانەکەش داخرابوو.
دکتۆر شەماڵ ڕایگەیاند، “هەرچەندە تەنها هۆکاری داخستنی نەخۆشخانەی ئاسا نەدانی شایستەکانی ئەو کارمەند و پزیشکانە نەبووە، چونکە لەماوەی ڕابردوودا کەمبوونەوەی توشبووانی کۆرۆنا یەکێکی دیکە لە هۆکارەکانی داخستنی بووە، بەڵام ئێستا کە ژمارەی نەخۆشەکان زیادیکردووە و کەرتی تەندروستی پێویستی بە نەخۆشخانەکەیە، دەبوایە بکرایەتەوە”.
بەڕێوەبەری دەزگای تەندروستیی پێشمەرگە ئاماژەی بەوەکرد، دوێنێ دووشەممە داواکارییەکیان سەبارەت بە کردنەوەی نەخۆشخانەکە و پێویستییەکانی ئاراستەی بافڵ تاڵەبانی هاوسەرۆکی یەکێتیی نیشتمانیی کوردستان کردووە و بەبڕیاری بافڵ تاڵەبانی بودجەی پێویست بۆ نەخۆشخانەکە تەرخانکراوە.
بەپێی وتەی دکتۆر شەماڵ جەبار یاوەر، ڕۆژی یەکشەممەی هەفتەی داهاتوو نەخۆشخانەکە دەکرێتەوە و دەتوانن نەخۆش وەربگرن، هەر لەسەر بڕیار و ڕاسپاردەی بافڵ تاڵەبانیش تا کاتێک کۆرۆنا هەبێت نەخۆشخانەکە بەکراوەیی دەمێنێتەوە، بودجەش بۆ سەرجەم کارمەندان و پزیشکانی نەخۆشخانەکە تەرخاندەکرێت.
