فه‌رمانده‌یی پۆلیسی فیدراڵیی عێراق ڕایگه‌یاند، له پارێزگای كه‌ركوك ده‌ستگیراوه به‌سه‌ر چه‌ندین بۆمب و مووشه‌كی فڕۆكه‌ی بێفڕۆكه‌واندا.
له ڕاگه‌یه‌ندراوێكدا كه ئێواره‌ی ئه‌مڕۆ یه‌كشه‌ممه 29ی ئاب بڵاویكرده‌وه، فه‌رمانده‌یی پۆلیسی فیدراڵیی عێراق ئاشكرایكرد، هێزێكی هاوبه‌شی پۆلیسی فیدراڵی و هێزه‌كانی هه‌واڵگریی سه‌ربازی، هه‌ڵمه‌تێكی گه‌ڕان و پشكنینیان له گونده‌كانی ده‌وروبه‌ری كه‌ركوك به‌رپاكردووه.
ڕوونیشیكردووه‌ته‌وه كه له گونده‌كانی باشووری خۆرئاوای كه‌ركوك ده‌ستگیراوه به‌سه‌ر مووشه‌كێكی “120 ملم”ی و سێ مووشه‌كی فڕۆكه‌ی بێفڕۆكه‌وان دا.
به‌گوێره‌ی ڕاگه‌یه‌ندراوه‌كه، له هه‌ڵمه‌تێكی تردا له ناحیه‌ی ڕیاز ئه‌و هێزانه ده‌ستیانگرتووه به‌سه‌ر 16 بۆمب و كه‌ره‌سته‌ی ته‌قه‌مه‌نیدا.
