مسته‌فا كازمى سه‌رۆك وه‌زیرانى عێراق ده‌ڵێت، “لوتكه‌ى به‌غداد پلانی عێراقه بۆ بنیادنانى باشترین په‌یوه‌ندی له‌گه‌ڵ ده‌وروبه‌ره‌كه‌یدا” و جه‌ختده‌كاته‌وه له‌وه‌ى هه‌ڵبژاردن له واده‌ى خۆیدا ئه‌نجامده‌درێت.
ئه‌مڕۆ پێنجشه‌ممه 26ى ئاب، مسته‌فا كازمى سه‌رۆك وه‌زیرانى عێراق له‌گه‌ڵ شانده میدیاییه عه‌ره‌بى و بیانییه‌كاندا كۆبووه‌وه كه بۆ ڕووماڵكردنى لوتكه‌ى به‌غداد هاتوونه‌ته عێراق.
به‌گوێره‌ی ڕاگه‌یه‌ندراوى نووسینگه‌ى ڕۆژنامه‌وانیی سه‌رۆك وه‌زیران، مسته‌فا كازمى ڕایگه‌یاندووه، كۆنگره‌ی به‌غداد بۆ هه‌ماهه‌نگی و هاوبه‌شییه و ڕووداوێكی گرنگه بۆ هه‌موو ناوچه‌كه نه‌ك ته‌نها بۆ عێراق.
جه‌ختیكردووه‌ته‌وه كه “ئاڵنگاریی زۆر هه‌ن كه ناوچه‌كه به‌ده‌ستیانه‌وه ده‌ناڵێنێت و پێویسته هه‌مووان كاربكه‌ن بۆ هێنانه‌ئاراى ته‌واوكاریی ئابوری و كۆمه‌ڵایه‌تی له‌نێوان گه‌لانی ناوچه‌كه‌دا”.
كازمى وتوویه‌تی، “چیتر به‌سه جه‌نگ و ململانێ و ناكۆكی، عێراق داوا له هه‌موو وڵاتانى ناوچه‌كه ده‌كات ئاشتی له‌سه‌ر بنه‌ماى ته‌واوكاریی گه‌لان بنیادبنێن و ئه‌وه‌ش پلان و بۆچوونی عێراق-ـه له‌م كۆنگره‌یه‌دا”.
هه‌ر له‌و كۆبوونه‌وه‌یه‌دا كازمى ڕایگه‌یاندووه، “دواى مانگ و نیوێك هه‌ڵبژاردنێكی چاره‌نووسساز و یه‌كلاكه‌ره‌وه ئه‌نجامده‌ده‌ین كه ڕێڕه‌وی دیموكراسی له وڵاتدا به‌هێزده‌كات”.
