مستەفا کازمی، سەرۆک وەزیرانی عێراق پەیوەندییەکی تەلەفۆنی لەگەڵ ڕەجەب تەیب ئەردۆغان، سەرۆک کۆماری تورکیا ئەنجامدا و ئەردۆغان ڕەتیكردەوە وڵاتەكەی بنکەی تەندروستیی لە شەنگال بۆردومان كردبێت.
لە ڕاگەیەندراوێكدا سەرۆکایەتیی کۆماری تورکیا ئاماژەی بەوەكردووە، لە پەیوەندییە تەلەفۆنییەکەدا ئەردۆغان و کازمی پەیوەندییە سەربازی و بازرگانی و هەواڵگرییەکانیان تاوتوێكردووە.
ئاماژەبەوەشكراوە، “سەرۆككۆماری توركیا بە پێویستی زانیووە هەماهەنگی نێوان توركیا و عێراق لەبەرەنگاربوونەوەی تیرۆر زیادبکرێن”.
باسلەوەشكراوە، “ئەردۆغان ئاماژەی بە بوونی پەکەکە لە قەندیل، مەخمور و شەنگال کرد و وتویەتی ئەو هەواڵانەی لەبارەی بۆردومانکردنی بنکەی تەندروستیی شەنگال لەلایەن تورکیاوە بڵاوکراونەتەوە دروست نین، بەڵکو ئەوەی کراوەتە ئامانج تەنیا ئەندامانی پەكەكە بوون و شوێنەکەش لەلایەن ڕێكخراوەكەوە وەکو حەشارگە بەکارهێندراوە.”
لەبەشێکی دیکەی ڕاگەیەنراوەکەدا هاتووە، سەرۆک کۆماری تورکیا ئەوەی خستوەتەڕوو کە توانای سەربازی وڵاتەکەیان گەیشتووەتە ئاستێک کەبتوانن ئامانجەکانی بەوردی بپێکێت.
لەچەند ڕۆژی ڕابردوو توركیا زیاتر لە سێ بۆردومانی لە ناوچەیەكی شەنگالی كرد و بەپێی هەواڵی میدیاكان ئەو شوێنە نەخۆشخانەبووە و بەهۆیەوە ژمارەیەك كارمەندی تەندروستی و ئەندامی یەبەشە شەهید و برینداربوون.
