ئەمڕۆ ئاگر لە دارستانی ناوچەی گەشتیاریی قەشقۆڵی لە قەزای دوکان کەوتەوە و بەهۆیەوە زیانێکی زۆر بە درەخت و سروشتی ناوچەکە گەیشتووە.
بەڕێوەبەرایەتیی گشتیی شارەوانییەكانی سلێمانی لەسەر ڕووداوەکە ڕایگەیاندووە، “بە ھۆكارێكی نادیار ئاگر لە بەشێكی دارستانەكانی ناوچە گەشتیارییەكانی قەشقۆڵی لە قەزای دوكان كەوتەوە و بەشێكی درەختەكانی مۆنۆمێنتی ئەنفالكراوانی دۆڵی جافایەتیشی گرتۆتەوە، بەداخەوە زیانێكی زۆری گەیاندووە بە درەختەكان و ژینگەی ناوچەكە”.
بەڕێوەبەرایەتیی گشتیی شارەوانییەكانی سلێمانی گلەیی لە دووبارەبوونەوەی دیاردەکە کردووە و ڕایگەیاندووە، “بەداخەوە دیسانەوە ئاگر، دیسانەوە فەوتاندنی ژینگە و سروشتی جوانی سنوورەکە، ئەم دیاردە ناشرینە جگە لە زیانگەیاندن بەکەرتی گەشتیاریی سنوورەکە، زیانێکی گەورەش دەگەیەنێت بە ژینگە و سروشتی سنوورەکە”.
