هاوسەرۆكی یەكێتی، عەدنان موفتی بەسەركردەوە و وتی، خەباتی ئێوە بەرپرسیارێتی ئێمەیە کە یەکێتی بپارێزین و بەھێزتری بکەین.
بافڵ تاڵەبانی، ھاوسەرۆکی یەکێتیی نیشتمانیی کوردستان و دەرباز کۆسرەت رەسوڵ، کارگێڕی مەکتەبی سیاسی لە ھەولێر عەدنان موفتی، ئەندامی ئەنجومەنی باڵای سیاسی و بەرژەوەندی یەکێتی-یان بەسەرکردەوە و لە نزیکەوە لە تەندروستییان پرسی و ڕۆڵ و ماندووبوونی ھەڤاڵ عەدنان موفتییان بەرزنرخاند لە شۆڕش و خەباتی کوردایەتی.
بافڵ تاڵەبانی لەو بەسەرکردنەوەیەدا دوپاتیكردەوە، یەکێتی بەچاوی ڕێزێکی زۆرەوە دەڕوانێتە خەبات و تێکۆشانی ھەموو ئەو سەرکردە و تێکۆشەر و پێشمەرگانەی لە ڕۆژانی سەختدا بەشدار و کۆڵەکەی شۆڕشی نوێ بوون.
هاوسەرۆكی یەكێتی وتیشی، “ئێوە سەرمایەیەکی نیشتمانی و گرنگ و بەنرخی نەک میللەتەکەمان، بەڵکو یەکێتیی نیشتمانیی کوردستانیشن و خەباتی ئێوەش بەرپرسیارێتی ئێمەیە کە یەکێتی بپارێزین و بەھێزتری بکەین”.
