بەڕێوەبەرایەتی ئاسایشی هەولێر، لەبارەی دۆسییەی کوشتنی مووسا باباخانی، ئەندامی کۆمیتەی ناوەندی حزبی دێموکراتی کوردستان ڤیدیۆیەکی بڵاوکردەوە و ڕایگەیاند، “بەپێی لێکۆڵینەوەکان بکوژی باباخانی ناسراوەتەوە و ئێستا هەڵاتووە بۆ ئێران”.
ئاسایشی هەولێر لە ڤیدیۆکەدا ڕایگەیاندووە، “بکوژی مووسا باباخانی ناوی سەرمەد داود عەبد عەلی و ناسراوە بە سامان ئیلامی و پەیوەندی گەرمی لەگەڵ باباخانی هەبووە، ڕۆژی کوشتنەکەشی خۆی چووە بەشوێنیدا لە ناحییەی بەحرکەوە هێناویەتی بۆ هەولێر”.
بەپێی زانیارییەکانی ئاسایشی هەولێر، ڕۆژی 7 ی ئەم مانگە (سەرمەد داود عەبد عەلی) چووە بەدوای مووسا باباخانیدا و دواتر چوونەتە هۆتێل “گوڵی سلێمانی” لە هەولێر دواتر سەرمەد داود، ناسراو بە سامان ئیلامی مووسا باباخانی کوشتووە و کاتژمێر سێی بەیانی هەڵاتووە بۆ خانەقین و دواتر بۆ ئێران.
