ئێوارەی دوێنێ لە ئەنجامی تەقەی هێزە ئەمنییەکانی سنووری بانە و هەرێمی کوردستان کاسپکارێکی تەمەن 47 ساڵ کوژرا.
بەپێی زانیارییەکانی کۆڵبەر نیوز و شایەتحاڵەکانی ڕووداوەکە، “هێزە ئەمنییەکانی بانە تەقەیان لە پۆلێک لە کاسپکار و کۆڵبەر کردووە، لە ئەنجامدا کاسپکارێک بەناوی ئومێد خەزەری تەمەن 47 ساڵ کوژرا و کۆڵبەرێکی منداڵیش، کە تەمەنی 18 ساڵ بووە، بە سەختی بریندار بووە”.
ئەم ڕووداوە لە کاتێکدایە ڕۆژی هەینی هێزە ئەمنییەکانی سنووری پیرانشار تەقەیان لە کۆڵبەران کردووە و لە ئەنجامدا دوو کۆڵپەر بەناوی (محەمەد چوکلی، محەمەد حسێنزادە) بەسەختی بریندار بوون.
کۆڵبەری، یەکێکە لە پیشە سەخت و پڕ لە مەترسییەکانی سنوورەکانی ڕۆژهەڵات و باشووری کوردستان، بەهۆی ئەوەی کۆڵبەری وەک پیشەیەکی قەدەغەکراو لەلایەن تارانەوە مامەڵەی لەگەڵدا دەکرێت، ڕۆژانە لەلایەن هێزە ئەمنییەکانەوە تەقە لە کاسپکاران دەکرێت.
