وتەبێژی قوباد تاڵەبانی دووپاتیدەكاتەوە، لە دوێنێوە بەهۆی ئەو هێزانەی لە دەروازە سنوورییەكان جێگركراون، هیچ كارێكی نایاسایی ئە‌نجامنە‌دراوە و ڕێگریی تەواو كراوە لە هەر هەوڵێكی قاچاخچێتی.
پاش ئە‌وە‌ی قوباد تاڵەبانی جێگری سەرۆکی حکومەتی ھەرێم بڕیاری-دا ھێزەکانی ئۆپراسیۆنی ئاسایشی سلێمانی سەر بە‌دە‌زگای ئاسایشی ھەرێم لەدەروازە سنوورییەکانی باشماخ و پەروێزخان و چەندین خاڵی تری گومرگی جێگیر بكرێن، لە دوێنێ دووشەممەوە ھێزە‌كە بەمەبەستی ڕوبەڕوبوونەوەی قاچاخچێتی و یاساشکێنی دەستبەکاربوون.
لە‌وبارە‌یە‌وە سە‌میر ھە‌ورامی وتەبێژی جێگری سەرۆكی ئە‌نجومە‌نی وە‌زیران رایگە‌یاند، “پرۆسە‌كە بەردەوام دەبێت و خودی قوباد تاڵەبانی بەردەوام لە‌سەر خە‌تە لە‌گە‌ڵ ھێزە‌كانی ئاسایش و لایە‌نە پە‌یوە‌ندیدارە‌كانی تر، بۆ ئە‌وە‌ی ڕێگریی تەواو بكرێت لە ھە‌ر یاساشكێنییە‌ك كە ئە‌گە‌ری ڕوودانی ھە‌بێت”.
ئاماژە‌ی بە‌وە‌شدا، “لە‌ماوە‌ی 24 كاتژمێری ڕابردوو و بەهۆی ئەو هێزانەوە ھیچ جۆرە كارێكی نایاسایی ئە‌نجام نە‌دراوە و ھێزە‌كانی ئاسایش و ھێزە‌كانی تری دە‌روازە‌كان توانیویانە ڕێگریی تەواو بكە‌ن لەهەر هەوڵێكی قاچاخچێتی”.
وتەبێژەكەی جێگری سەرۆكی حكومەت دڵنیاییدا، “ھێزە‌كانی ئاسایش بەردەوام دە‌بن لە ئەرکەکانیان و لە‌دە‌روازە‌كان دە‌مێننە‌وە”، هەنگاوەكەشی بە گرنگ زانی بە ئاراستە‌ی چاکسازی و سەروەریی یاسا و پارێزگاریکردن لە مافی گشتی.
