دوای ئەوەی هێزێکی ئۆپراسیۆنی تایبەتی ئاسایشی هەرێم لەژێر ڕێنمایی بڕیارەکانی جێگیری سەرۆكی ئەنجومەنی وەزیران لە خاڵی سنووریی پەروێزخان جێگیربوو، سەرپەرشتیاری ئیدارەی گەرمیان دەڵێت، “تا ئەوکاتەی پێویستبکات و بۆ ڕێگریکردن لە قاچاخچێتی هێزەکە دەمێنێتەوە”.
جەلال نوری، سەرپەرشتیاری ئیدارەی گەرمیان بە تۆڕی میدیایی ئێستای ڕاگەیاند، “ئەمڕۆ هێزێکی ئۆپراسیۆنی تایبەتی ئاسایشی هەرێم لە خاڵی سنووریی پەروێزخان جێگیرکرا و تا کاتێک کارەکان لەو خاڵە سنوورییە بەشێوەیەکی ئاسایی و یاسایی بەڕێوەدەچێت”.
سەرپەرشتیاری ئیدارەی گەرمیان ئاماژەی بەوەشکرد، “لە هەر شوێنێکی دیکە پێویستبکات و گومانی بوونی قاچاخچێتی هەبێت، ئەو هێزە ئامادەیی هەیە و بڕیارەکانی قوباد تاڵەبانی، جێگیری سەرۆکی ئەنجومەنی وەزیران جێبەجێ دەکەن”.
دوو ڕۆژ لەمەوبەر، بۆ ڕێگری لە قاچاخچێتی و یاساشكێنی، جێگری سەرۆكی حكومەتی هەرێم بڕیاریدا هێزەكانی ئاسایشی هەرێم لە دەروازەكانی باشماخ و پەروێزخان و چەند خاڵێكی دیكەی گومرگی جێگیربكرێن.
